السفهاء

- دايما أقلب ف قنوات الديش آخد نظرة على كل المحطات قبل ما اختار حتفرج على إيه، و ترتيب قنوات الديش و داون لودينج الجديد منهم مزاج عندى، مرتباهم من الأول كده، قنوات الفرى فورين موفيز بعدين قنوات الفرى عربى موفيز بعدين قنوات الفرى مسلسلات بعدين القنوات المصرى الخاصة بعدين خليط من القنوات العربى المتنوعة بما فيهم قنوات الفرى كارتون بعدين القنوات الإخبارية إبتداءا بالجزيرة مباشر حتى الأقصى و الراى، لو مش عاجبنى اللى ف الإى بى جى ألف القنوات دى كلها بسرعة أشوف أتفرج على إيه، المهم من كام يوم كده يمكن أسبوع بالف فلقيت على دريم الشعراوى فقلبت لقيته برضه ع المحور، جذبنى اللى كان بيكلم عنه، وصاية الأوصياء على أموال القصر، "و لا تئتوا السفهاء أموالكم" و بقية الآية مش فاكراها، المهم كان تفسيره للآية إن استخدمت كلمة أموالكم ف الآية دى دلالة على الأموال التى يحوزها القصر أو المجانين لإنها ف الحالة دى مش أموالهم لكن أموال الأوصياء، ثم تكمل الآية كذا كذا "فادفعوا لهم بأموالهم" يعنى لما يكبروا أو يعقلوا حتبقى أموالهم فرجعوها ليهم، بغض النظر عن التعليمات اللى ف الوسط من التعفف عن تقاضى أجر عن الخدمة دى فى حالة الثراء أو تقاضى الأجر بالمعقول فى حالة الإحتياج، اللى لفت نظرى ف الموضوع هوه المنطق نفسه، بالرغم من إن دى أموال ناس بعينهم أيا كانت سنهم أو حالتهم فالخطاب موجه لآخرين بأن دى أموالكم مش أموال أصحاب المال و ما تدوهاش لهم!! بصراحة شىء أشبه بالتحريض على السرقة، متهيألى المعنى كان ممكن التعبير عنه و التأكيد عليه بأسلوب تانى خالص ليس به شبهة و اللخبطة اللى ممكن تنتج عن نسب أموال أحد للغير و تطميعه فيها بالشكل ده، شىء غريب حبتين، اللى خلانى أكتب بأه عن الموضوع ده إن ده هوه نفس المنطق اللى عند الغرب اللى دايما بيتجهوا ناحية منطقتنا عشان يستعمرونا، و لا تأتوا السفهاء أموالكم، و لا نفطكم و لا مناجمكم و لا ميتكم و لا زرعكم و لا أرضكم و لا بحركم، لما يبقوا يعقلوا إبقوا رجعوهالهم، و دول لا عمرهم بيكبروا و لا بيفوقوا و لا بيحافظوا على اللى عندهم، يبقى لا تأتوا السفهاء أموالكم، احجروا عليهم و اعملوا نفسكوا اوصياء على المال السايب ده، نفس المنطق بالظبط، احنا سفهاء لا نصلح غير للخدمة، و للأسف إن نظريتهم ف الأغلب الأعم بيثبت صحتها
- من نفس المنطق شفت النهارده اللى اتعمل ف السفير التركى ف الكيان الصهيونى السرطانى اللى بيسموه اسرائيل لكن ف الحقيقة ما فيش غير فلسطين، نفس منطق الإستعلاء، السيد مع العبيد، بجد الصهاينة دول شبعة من بعد جوعة، تلاقى دايما الخسيس أما يشبع يحب يعامل الناس كلها زى ما كان بيرضى لنفسه، عايز الكل عبيد حواليه، ما شفتش لا أخس و لا أحط م المنظر ده، ناقص كانوا يفرشوا للسفير التركى ع الأرض، منظر بيفكرنى باللى قريت مرة إن السادات كان عايز يعمله مع أحمد الخواجه نقيب المحامين لما دعاه للتخاطب معاه فلقاه الخواجة قاعد و مافيش كرسى له فراح قاعد قدامه ع الأرض، أكيد كان منظر فكاهى من الطراز الأول
- كنت بتفرج إمبارح على بين قوسين ع المنار و كان فيه مناقشة حوالين اللى منتظر يحصل ف المنطقة و توقع إن حتكون فى حرب تانية على غزة، آز إف، حرب إيه، ده قتل للعزل مالوش علاقة بالحرب، و تخوف إن وقتها أطراف كتير منها سوريا و حزب الله حيدخلوا فيها، و بقالى فترة مش متابعة الوضع بس متهيألى إن نفس التخوف ده هوه سبب المصالحة بين أحزاب لبنان، مش مجرد تشكيل الحكومة، و إن الحرب القادمة دى من أسباب بناء السور الفولاذى و السور الإلكترونى، لكن أظن إن مش حيكون فى حرب الرصاص المسكوب و لا حاجة، حيكون مجرد كلام برضه زى الحرب على إيران مش أكتر، ما أظنش فى حد ممكن يخاطر بحرب شاملة ف المنطقة