إضرب ف المربوط و مواضيع أخرى

الإستراتيجية الجديدة لأوباما، الحائز على نوبل، فى أفغانستان هى إرسال سبعين الف جندى إضافيين! و بما إنه رجل سلام فكان لازم يقرن فيضان الدمار ده بميعاد للإنسحاب و نهاية الحرب، الفين و حداشر! و طبعا لما تيجى الفين و حداشر حيكون فى ذريعة تانية لإرسال سبعين ألف تانيين برضه مقرون بميعاد تانى للإنسحاب و هلم جرا و أهو بأه نوع جديد من أنواع الإستعمار، الإستعمار من أجل فرض السلام!! كاوبوى مينتاليتى بتفترض دايما إنهم بيتعاملوا مع بهايم، و الأشكال دى حقيقى ما ينفعش معاهم غير طالبان و القاعدة، سبب تانى للسبعين الف دول، إنهم يرسموا، اللى ورا الستارة يعنى، اللى دايما ورا أى رئيس أمريكى، يرسموا الصورة لأوباما على إنه زى ما هو رجل سلام فهو أيضا رجل حزم، رجل حرب، و الكلام ليكى يا إيران، لكن نجاد بكل عيوبه الديكتاتورية إختار الرد السليم و إعلن إستقلال قرار و إرادة إيران بقرار تخصيب اليورانيوم ف الداخل، ده تصرف الشعوب اللى عايزة يبقالها مكانة و إرادة مستقلة، تعالوا بأه عندنا، أول إمبارح كنت بقلب ف الدش فوقفت عند قناة الفراعين أسمع، كان برنامج م البرامج الدينية دى اللى كلها كلام ع الستات، ساعات بستنى اسمع عشان اضحك ع التخلف و معظم الوقت بقلب بسرعة عشان دمى ما يولعش من التخلف ده، فضلت أسمع يوميها لحد ما دمى ولع فعلا، كلام من صنف إن نسب الطفل الناتج من علاقة غير زوجية لأبوه عن طريق الدى إن إيه ده كان أكبر غلطة و سبة و عار ف وجه من حكم الحكم ده، قصدهم على قضية الحناوى و الفيشاوى!! و إن الطفل اللى يبقى بريكونسيفد قبل الجواز ينكتب ابن زنا حتى لو والديه عقدوا قرانهم!! لكن بأه من رحمة و تسامح اصحاب الأراء الأخرى و منهم الضيفة اللى هى معرفهاش بس عميدة كلية البنات للشريعة تقريبا، فبدام صلحوا غلطهم و اجوزوا يبقى ينكتب الطفل بإسم والده، لكن لو ما اجوزوش يبقى حتى لو اتثبت بالدى ان ايه إن الطفل صحيح النسب للأب اللى الأم بتنسب الطفل إليه!! سمعت كمان كلام من صنف إن اللى تحمل و تخلف تشيل بلوتها لوحدها هى بس و الراجل مالوش أى دعوة!!! و الكلام الخايب ده دايما بيخلوا يجرى على لسان ستات عشان يبقى شهد شاهد من أهلها، هوه أصل الحمل مش بيحصل كده، ده لازمله خلوة و وقت و اللى تحط نفسها ف الموقف ده و تضعف زيها زى أى راجل تشيل بلوتها و تأعد العمر كله شايلة عارها، بالحرف كده، و لا تتجوز و لا تعرف حد تانى و تأعد تربى ايتام و اللى يجيلها يطلبها تتحجج بأنها مش عايزة تتجوز عشان تدارى عارها!! كل الكلام ده على لسان واحدة ست، واضح إن الشرف واخد حده معاها ع الآخر، و لسه الكلام على لسانها برضه، و دى نقطة ذكرت من واحدة ست تانية برضه، و هى إن بما إن الست هى اللى اتخلقت بتحمل و تخلف و عندها غشاء البكارة، يلعن أبو غشاء العكارة ده و اللى جانا منه، بدام هذا كذلك يبقى لازم الست هى اللى تشيل البلوى لوحدها و الراجل مالوش دعوة خالص!!! و قبل كده كان ف سياق الكلام على لسان العميدة فى معرض الأراء اللى هى مش موافقة عليها، إن مش فاهمة شيخ مين أفتى بإن الشاب اللى ينام مع واحدة ما يجوزهاش!!! بعد وصلة التخلف دى كلها اللى ولعت دمى و اللى خلت الست المصرية منا حيطة مايلة لبلاوى الرجالة المستهترين و خلتها ف المقام مش أكتر من حتة لحمة، و كل ده بلسان ستات مصريات عفيفات شريفات الواحدة منهم حتلاقيها ف شغلها عايشة على حسب مقولة الناس على دين ملوكهم و ملك العفيفة الشريفة حيكون بلا جدال حرامى لكنها برضه ماشية ف السليم، بعد كل ده و لأول مرة ف حياتى أتصل ببرنامج عشان اكلم ع الهوا، قدمت نفسى على إنى نيللى من القاهرة و ماقلتش غير كلمتين، الناس بره بيكلموا عن السلاح النووى و احنا هنا لسه بيتقال علينا عالم تالت بسبب المناقشات اللى زى دى، و قفلت السكة، الدقيقة بجنيه و نص و الكلام الكتير و لا ليه فايدة مع العالم دول.المعارضة إيه غير شجاعة؟ إزاى أكون معارض لحد و نظام و بكلم عنه بكل سوء و ف نفس الوقت بمشيله العن مصيبة عملها النظام ده و بشارك معاه فيها؟! طبعا ما ينفعش ف الوقت ده يتقال عليا معارض، لإن عمر ما كان فوتلى معارضتى و أفوتلك يا نظام أكبر بلوى من بلاويك ممكن يتقال عليه سياسة أو حنكة لمعارض ما، لكن ده يبقى تناقض ينتفى معاه المعنى، خلاص كده ما بقيناش معارضة، ليه كل الكلام ده؟ عملت من فترة شريط فيديو عليه مشكلتى حكيت فيه التفاصيل كلها، و كان من الناس اللى حبعته لهم الأستاذ يحيى الجمل، و لو حد كان قرى ليا البوستات القديمة حيلاقونى كاتبة الراجل ده من ضمن الناس اللى شايفة فيهم معارضة شريفة ممكن يكونوا مرشحين للرئاسة، أد كده كنت بقدر الراجل ده، المهم رحت له إمبارح ف المكتب عشان اسلمه الشريط فقابلته شخصيا بعد خمس دقايق ف مكتبه، الحقيقة كنت عايزة اسلمه الحاجة باليد عشان اطمن إنها وصلتله، دخلت و قلتله أنا شرفت بمقابلتك، و زعلانة دلوقت إنى قلت كده لإنى زهقت من كسرة قلبى كل ما افتحه لحد، بقيت حاسة انى مغفلة و بكره نفسى عشان كده، المهم كان لطيف زى ما بيبان ف التليفزيون و قاللى اتفضلى لكن قلتله مش عايزة اعطلك انا حسيبلك الحاجات دى بس، سألنى بخصوص إيه!! زهقت بأه، حقيقى زهقت، يعنى مش عايز تدخل نفسك ف مشاكل خد الحاجة و اسكت، طيب حبقى ابص عليهم، لكن برضه نفس الإنكار كأن مفيش حاجة أبدا؟! بالذمة دى تبقى معارضة، برضه نفس الإستهبال ف الموضوع و أصل و لا حاجة بتحصل و لا حاجة حصلت و لا نعرف حاجة عن الموضوع و لا نعرف إنتى مين؟! و يلعن ابو اللى زهقت بأه م العيشة و بتدعى كل يوم عزرائيل ييجى ياخدها عشان تترحم من أستعباط الناس و افتراهم فيها؟! هوه ده الحل حتى عند المعارضة؟ استهبل و اعمل كأن و لا فى أى حاجة بتحصل مسيرها تنسى و لا مخها يتلحس م الافترا؟! و بعدين أخرج من عنده ألاقى سفالة و قذارة من صنايعية و شوارعية و أكبر راس ف المعارضة شايف إنى أحقر من إنه يدافع عن عرضى و لحمى و كرامتى اللى اندهسوا ف بلدى؟! حتى المعارضة شايفة إنى يتاعة العالم دول و يتصرفوا فيا زى ما هما عايزين؟! صورة الراجل الفلانى؟! ده كلام يا عالم ده؟! حد يغتصب واحدة يقوموا يسيبوهالوا؟! تبقى معارضة إيه دى؟! و لإمتى حنفضل مخدوعين؟! و لو ما كنتش تحط حياتك على كفك و تقول الحق تبقى تقدر تقول على نفسك معارضة إزاى؟! لحد عندى و الكل بيكش، لإن فيها موت و خراب ديار، و لو ما كانش الكل متفرقين بالشكل ده ما كانوش قدروا يهددوا الكل بالشكل ده، و بصراحة لو ما كنتش تقدر تجازف بفقدان حياتك و ثروتك ف مقابل انك تقول الحق ف موضع انتهك فيه الحق لحد ما انداس بالشكل ده يبقى ما تتصداش للمعارضة و تخدع الناس بالكلام عن الصح و الغلط ف كل مكان، تبقى إزاى معارض للحكومة و انت مطنش على العن بلوى ارتكبتها؟! تيجى إزاى دى؟! يا ترى أيمن نور و العوا و هيكل كمان من المعارضة الحصيفة السياسية دى؟! متهيألى كده، متهيألى كل اللى بره السجن عايشين بس عشان الحصافة و السياسة اللى بيتميزوا بيها، بصراحة أنا معرفش لا حصافة و لا سياسة ف الحق، أصل الكدب و المواربة ما لهمش علاقة بالحصافة و السياسة، هوه كده أو مش كده، لكن اللف و الدوران و التربيطات دول ما لهمش علاقة بالحق على الإطلاق و أنا بصراحة ما فهمش غير الكلام بالحق، يا ما عذرت و قلت بيعملوا اللى يقدروا عليه، فيها قتل و طيران رقاب و خراب ديار، يمكن بيستهبلوا قدامى كده عشان يقدروا يفضلوا ع الساحة و يساعدونى من حيث لا أدرى، لكن اتضحلى ف الآخر إن الأسلوب ده هوه اللى خلانى بقالى اتنين و عشرين سنة مرمية و بنداس من زبالة، اللأ لأ و الآه آه و لا يصح إلا الصحيح، و لو كان ده الحال لا كنت فضلت مرمية كل ده و لا كانوا عملوا كده من أصله، لكن عشان متأكدين من العقل اللى محصلش اللى الكل بيتصرفوا بيه طاحوا و خربوا الدنيا و ولا على بالهم لدلوقت لإن الكل بيسمع الكلام، و لو إنت عايز تغير بصحيح بتعمل الصح مش بتسمع كلام اللى طول النهار و طول الوقت و ف كل مكان بتنتقده، دى تبقى تمثيلية هزلية مش معارضة أبدا و بصراحة ما كنتش اتخيل إن التمثيلية واصلة حتى لناس زى دول