يادى الفضايح

هل فى دولة بتحترم نفسها ف العالم لما المواطنين بتوعها يتهاجموا و يضربوا ف دولة تانية و يترمى عليهم أزايز جاز والع ف أماكن عملهم و بيوتهم تتنهب و يسرقوا الحاجات اللى فيها و ينذروا إنهم فى خلال مش أكتر من تلت ساعات يغادروا بيوتهم و إلا، مهما كانت قرب العلاقات الجغرافية و التاريخية للبلدين دول مع بعض هل فى دولة محترمة تسكت على الإعتداء على مواطنيها بالشكل ده و تبرر سكوتها ده بقرب الصلات و احنا زعلانين من الإعتداءات اللى حصلت على مواطنينا بس إحنا كلنا عرب و أخوة و تاريخنا واحد و مش حنخسر بعض! اظن الكل لاحظ رد الفعل على الإعتداءات اللى المصريين ف أوراسكوم و مكتب مصر للطيران و المقاولين فضلوا يصوتوا منها ليلة بحالها على الحياة، يوم الإتنين اللى قبل ماتش الاربع، و رد الفعل بعد الخسارة ف السودان، تهريج أكتر من كده مش ممكن، يعنى يلعن أبو مصر و المصريين إنشالله يتحرقوا بجاز ليترالى بدام فى فرصة إننا نقف إحنا و العيلة نحييى الجماهير لما فريقنا يوصل المونديال و تبات مصر كلها مهيصة ف الشوارع و بتغنى مصر اليوم ف عيد و ينسى القطيع و للا يجيله فقدان ذاكرة وقتى البلاوى المتلتلة و الفساد و الخراب و الضلمة الكحل اللى ع الأبواب و اللى بيتعمل ف اقسام البوليس و قانون الطوارىء اللى بقاله تلاتين سنة، يعنى الحكاية كلها العيلة الحاكمة و إستمرار العيلة الحاكمة ف الحكم أما المصريين نفسهم فدول إتحولوا لبهايم لما نعوز نضحى بيهم دون تردد و لما نقبنا يطلع على شونة و نحتاجهم نطلعهم م التلاجة و نسيح التلج من عليهم، يعنى ليلة ما تفرجت على حلقة الحياة دى دورت على أخبار ع الديش كله ما لقتش، رحت على التليفزيون الأرضى عشان أعرف حد حصلله حاجة و للا مجرد إصابات، و لا حس و لا خبر، و لا كلمة واحدة عن الموضوع، التليفزيون و الديش ماشيين عادى و هيصة و هليلة و يا حبيبتى يا مصر و الناس بيصوتوا صويت ع الحياة فقط! و دلوقت، النهارده بيعيدوا حلقة م المسلسلاتى ع الدراما فيها ماجد المصرى و ماهر عصام و جت سيرة اللى بيحصل للمصريين ف الجزاير و كان هوه التعليق ما فيش غيره، مصر و الجزاير أشقاء و أخوة و كلنا عرب!! يخرب بيت كده!! و من ساعة ما اتغلب الفريق ف السودان و طار المونديال و فرة ف الأرضى و الفضائى و الكل لبس إسود و قعد يندب على النبل اللى ما بقاش ف حد غيرنا!! قناة الساعة ريحت نفسها و شغالة ف فلسطين من ساعتها و لا ليها دعوة باللى بيحصل ف البلد، كأنهم المعارضة بتوع فلسطين مش مصر! كأن لما تسيب مواطنين بلدك يتبهدلوا جوه و للا بره حيبقى ده نبل مش خيبة و بلوى! كأن كده ممكن حد حيحترمهم و للا يحترمك و للا يحترم البلد!! من إمتى السكوت ع البهدلة بقى نبل و أخوة و عروبة!! ليه من ساعة ما حصلت الإعتداءات دى ما اتعملش حساب ماتش السودان و بعتوا قوات على حساب الحكومة ف صورة مدنيين عشان حماية المصريين هناك؟! تفسير بسيط جدا إنهم ما يقدروش يستغنوا عن قواتهم هنا لإنهم محتاجينهم لقمع المواطنين، ما تمش إستدعاء السفير الجزائرى و توبيخه على اللى بيحصل و الإتصال بالخارجية و طلب حل من الحكومة الجزائرية ليه؟! السبب بسيط، انهم كانوا حاطين ف بطنهم بطيخة صيفى و عندهم أمل، ما تمش إستدعاء السفير المصرى للتشاور من ساعتها ليه؟! اللى عمالين يقولوا ف القنوات إنه أعلى مراتب الغضب ف السياسة؟! يا خبر إسود! أمال قطع العلاقات يبقى إيه و سحب الإستثمارات يبقى إيه؟! ده كل اللى عملوه دلوقت إنهم منعوا المزيكاتية و الألاتية المصريين و الجزايريين من التبادل، بس! يعنى منعوا كتائب الأنس و الفرفشة! جت أى سيرة لسحب الإستثمارات من هناك؟! أبدا، و مش حتيجى، لإن القرش و النكلة للعيلة دى و حكومتها أهم مليون مرة من أرواح مليون مصرى، المصريين بالنسبالهم عبيد بيسخروهم و بهايم بيحلبوهم عشان يكنزوا على قلبهم مليارات، ثروة جمال مبارك على حسب الجزيرة ستماية و خمسين مليون دولار!! جابهم منين؟! هوه إيه شغلته بالظبط؟! و ساعة أما العالم دول يتزنقوا يا يبيعوا الملايين دول يا يدبحوهم، مافيش امل حقيقى لإن الشعب ده فسد، فاسد من الأول أو إتفسد بس المهم إن دلوقت بقى فاسد فساد العفن، فساد الماء الراكد اللى ما بيتحركش، فيما عدا قلة بسيطة زى اللى ضربوا البوليس النهارده و احرجوا النظام قدام العالم فاللى انا شايفاه ف البلد دى غريب و مش طبيعى و بقى شبيه بالموت، منظر مصر ف العالم بقى فضيحة، بقت أمة من السوقة و الهمج، هل كان سبب إعتداءات الجزائريين فعلا إصابات حصلت هنا ف مصر لتلاتة من لعيبتهم زى ما اتقدمت شكوى للفيفا ضد مصر و بتتحقق دلوقت؟ لسه إمبارح بليل متفرجة على فاروق الباز ف بلا حدود و هوه عمال يكلم إزاى فضل تلتاشر سنة يتحايل على وزارة الزراعة عشان يحفروا بير ف شرق العوينات يستكشفوا بيه وجود المية اللى باينة عندهم ف القمر الصناعى، من اتنين و تمانين لخمسة و تسعين، و خمس سنين تانيين عشان يحفروا البير! إزاى المصريين ساكتين على هوانهم ده كله ف بلد بعد التانية؟! مش يتحركوا بأه ضد الحكومة اللى رخصتهم كده ف العالم كله وللا مستنيين يعملوا فيهم إيه تانى؟!