رسمى

بعد حكاية المنتخب و قبلها منى زكى كده بقت رسمى، المصريين بيدفعوا الفاتورة، أنا ماليش ف الكورة بس صراحة شايفة عيال زى أبو تريكة و احمد بلال اللى شفتهم خصوصا الآخرانى ده ف التليفزيون و هوه عيل ما جابش السبعة و عشرين و معاه تلت عيال و كان لطيف جدا ف كلامه، و إيه الكلام الهباب اللى اتقال عليهم ف القاهرة اليوم؟؟ حاجة غريبة أوى لإن لو خمسة منهم راحوا عكوا مع محترفات فمعناه إيه ده إن يتقال ع الباقى إنهم فريق مش محترم؟؟ دول يرفعوا عليه قضية تشهير، و بعدين هما مش عبط عشان يضيعوا نفسهم و يخلوا فرصة زى دى تروح من ايدهم، و بعدين واحد زى روماريو البرازيلى كان يقولوا يروح يسهر لما يتعمى ليلة الماتش و يروح يلعب، و ليلة الماتش بتاع أمريكا و انا مش بتفرج على ماتشات خالص و لا شفت أى ماتش منهم لكن و انا بقلب ف المحطات لقيتهم جايبين على نايل لايف و مصر مغلوبة تلاتة فيلم أمريكان بريزدنت!! دول الأمريكان دول فريق الستات بتاع الكورة بتاعهم باين خد كاس العالم لكن الرجالة و لا لهم ف الكورة، سورى يعنى بس انا شامة ريحة الكونسبيراسى ف كل حاجة، العالم الهبل اللى عملوا الهبل ده كله مش كتير عليهم يعملوا أى حاجة، و آخرة خدمة الغز يا مصريين نبقى زريبة البهايم بتاعة اليهود، البهوات يعكوا و الشعب يتعكوا و آدى آخرة سمعان الكلام يا حصفة