ف السريع

- مذيع حالة حوار ع القناة الأولى النهارده: "إحنا مش معركتنا مع الدولة، إحنا معركتنا مع تخلف المجتمع!!" مع الشعب البيئة دول اللى ملوا البلد!! ماهوه لا التعليم و لا الرعاية الصحية و لا الإقتصاد دول مسئولية الدولة اللى كابسة على انفاسنا من تلاتين سنة، قصده الحكومة يعنى، دول مسئولية المجتمع المتخلف!! الشرطة مش فى خدمة الشعب، الشرطة و الشعب فى خدمة الوطن!! وهوه إيه الوطن يا جهابذة؟ شوية المبانى و الأرض و التراب من غير ناسها أصحابها اللى بيعمروها؟! يعنى احنا يا مصريين نخدم المبانى و الأرض لإن هوه ده الوطن؟! هى دى مصر؟! الأرض و المبانى و الناس دول خارج مسمى الوطن؟! و لما الأرض و المبانى و الشركات و الممتلكات يبقوا ملك الأجانب نفضل برضه يا شعب ف خدمة المبانى و هوه ده الوطن و احنا يا ناس يا مواطنين ف التراوة؟! عايشين أجرة بلقمتنا يعنى؟! هوه مين مفروض بيخدم مين بالظبط؟! هى الحكومة إتوجدت عشان تخدمنا و للا احنا يا ملايين اللى مفروض بنخدم الكام الف دول؟!

- برنامج دينى على المحور النهارده من ساعة و نص كده من واحد من الدعاة الكاجيوال بتوع اليومين دول: كان مش فاهمة مين من المسلمين ماشى ف الصحرا و الدنيا ولعة و الشمس تسيح نافوخ الحديد و الرمل شوية و حيبقى قزاز آم المسلم ده سمع صدى صوت النبى بيقولهم ف المسجد إجلسوا آم جالس حضرته ع الرمل المولع و ف وسط الصحرا من غير أى ساتر و ماقامش لغاية ما سمع الرسول بيقولهم قوموا!! سأله الرسول بعدها ليه عملت كده يا فلان فكان رده إنه كره أن يسمع كلمة للرسول و لا ينفذها!! ف اللى ما تحجبتش تروح تتحجب يا نسوان يا كفرة يا عورات و اللى مش بيصلى يقوم يفز يصلى و يسيب الكاجيوال يرص الكلمتين الحنينين اللى عنده و اللى مخاصم بابا و ماما يقوم يتلم على دمه و يكلمهم، ده كلام كاجيوال بتصرف من عندى!! هوه إحنا فعلا ف معركة، مع الغباوة و النفاق، يا عم روح إقلع الجينز و البلوزة الحمرة المخططة اللى انت لابسها و البس اللبس بتاعك، العمة و القفطان، اللى من بره عمالين يكجولوه و الكلام عمالين يسبلوا فيه و ينعموا ف اصواتهم و يبشوا و اللى من جوه اتحجر و بقى حفريات و ريحته فاحت و التجارة شطارة