Saved

1- هل لما الألف إتحرقوا ف القطر إتقطعت البرامج ف القنوات الأرضية و إتذاع قرآن؟؟
2- هل لما الألف غرقوا ف العبارة إتقطعت البرامج ف القنوات الأرضية و إتذاع قرآن؟؟
3- هل لما إتحرقوا الخمسماية و لا معرفش كام ف قصر الثقافة إتقطعت البرامج ف القنوات الأرضية و إتذاع قرآن؟؟
4- هل لما إتفعصوا المية و للا الميتين بتوع الدويقة تحت صخرة المقطم إتقطعت البرامج ف القنوات الأرضية و إتذاع قرآن؟؟
5- هل لما حصلت أى مذبحة ف أى بلد عربى محتل بفعل الإحتلال، يعنى فلسطين أو العراق او لبنان بفعل اليهود أو الأمريكان، إتقطعت البرامج ف القنوات الأرضية و إتذاع قرآن؟؟
أكيد فى أمثلة تانية كتير أنا مش متذكراها على حوادث محلية راح ضحيتها العديد من الرجال و النساء و الأطفال و لا كان لها أى تأثير رسمى، فهل يعقل إن طفل بيبى، حفيد رئيس جمهورية، يتقطعله الإرسال على القنوات الأرضية كلها ف الإرسال الأرضى و الفضائى و كمان يشاركهم القنوات الرأسمالية كلها، قناتين دريم و المحور و قناتين الحياة و أون تى فى؟؟ هل يعقل اللى بيحصل ده؟؟ كده بقت ملكية رسمى، و مش أى ملكية، مش ملكية بريطانيا العظمى مثلا إللى لو إليزابيث نفسها حصللها حاجة لا أظن أحد يجرؤ هناك على قطع الإرسال بالشكل ده، كده بقت ملكية قبلية من صنف ملكيات طويل العمر يطول عمره و يزهزه عصره، أفراد الشعب ليس لهم أى إعتبار و طفل بيبى لسه يتعملله كل ده!! بغض النظر عن إنى أول ما رأيت الخبر إتأثرت فعلا لإن ده بيبى ذنبه إيه، و حتى أما فكرت إنها حتبقى عبرة لأهله عشان يبطلوا إفترا رجعت برضه و فكرت إن اللى حب الدنيا يغلبه كده شوية و بتنسيه الدنيا أى حاجة غير زخرفها حتى لو إتاخد عيل من عياله هوه شخصيا، و ده اللى كمان لما لقيت الخبر فكرت فيه، طب مش كان عزرائيل خد الإبن بدل الحفيد و خلص الكل من مليون حاجة، أب مفترى و أم مفترية لو كان قلبهم إنكسر على بكريهم كان سمهم إنكسر كتير، و الأهم من ده أزمة توريث على الأبواب يا عالم حيكون إيه تأثيرها لو كان عزرائيل غير إتجاهه شوية كان حللنا المشكلة من غير نزاعات، و ناس زاد الظلم عليهم كانوا حسوا إن برضه لسه فى نوع من الإنصاف و المساواة ف الدنيا و لو حتى ف الموت و يبقى زى ماهما إنضروا أو ولادهم ماتوا يبقى السبب ف كل أذاهم ده برضه طاله شىء من الأذى اللى طالهم و إن كلنا بشر و إن الافترا آخرته دمار ع اللى بيرتكبه، بس جت ف بيبى مالوش ذنب حتى لو اتوجع قلب اهله عليه فمش حيحل حاجة، لكن أنا شايفة إن ده كويس للبيبى نفسه، ماهوه اربع خمس سنين يبقى بيبى برضه، حيروح يلعب مع عيال فلسطين و العراق و عيال القطر و العبارة و العيال المظاليم كلهم، دول ما عندهمش مشاكل ف حاجة مع بعض، دول اللى ممكن يصالحوا الدنيا كلها على بعضها، و اهم من ده كله إن البيبى ده نجى و اترحم من أفعال عيلته و من النشأة اللى كان حيتنشأها، كان حيتعلم الظلم و النهب و الإفترا، ده كده رحمة لأهله لأنه ببرائته دى حيشفع ليهم يوم حسابهم، نطلبله و لكل الأطفال اللى زيه، اللى مريض بسرطان و للا شلل و لا أى مرض، نطلبلهم و نطلب منهم الرحمة