Not all inboxes are created equal

و انا بفتح ميل الياهو دلوقت لقيتهم كاتبين كده، الكدبة اللى كل نصاب و بلطجى بيبرر بيها إفتراه، بتوع ألبير كامو و كل من بأه ندل بأه عبقرى و صاحب رؤية و نظرة ثاقبة.
أوكيه، مش كل الناس متساويين ف القدرات و كمان مش كل الناس متساويين ف الظروف اللى بيمروا بيها ف حياتهم، ده واقع ما فيهوش جدال، فى ناس ذكائهم على أدهم لكن ف نفس الوقت فى ناس بيكون ذممهم و أخلاقهم و مشاعرهم على أدهم و فى ناس على أدهم ف الاتنين و غالبا اصحاب الكدبة دى ما بيكونوا منهم، شراسة على غباوة يخلوهم يظنوا ف روحهم إنهم من نار و بقية الناس من طين ف حين إن كلنا بنتولد و بنرضع و بناكل و بندخل الحمام و ف الآخر بنموت، مافيش حد مخلد، كلنا أولاد و بنات حوا و آدم، و العالم أصحاب نظرية السوبرمان بتاعة نيتشه دول إزاى بأه هما بيظنوا ف نفسهم العبقرية و ف الحقيقة هما بيبرروا لروحهم شراستهم و إنعدام أخلاقهم لدرجة بتوصلهم للغباوة المطبقة، إزاى؟؟ لإن العالم الشرسين دول هما ف الحقيقة بلطجية عايزين يدوا سفالتهم بعد فلسفى، إيه الدليل؟؟ الدليل هوه إن عمر حد شاف حد م العالم بتوع التفوق و مش كل البشر زى بعض عشان كده من حق المتفوق يعامل الأدنى منه و يستغله زى ما جنس البشر بيستغل جنس الحيوانات تماما، عمر حد شاف حد من دول بيوصل لأهدافه بالإقناع؟؟؟؟؟ بالحقيقة؟؟؟؟؟أبـــــــــــــــــــــــدا، نفر، دايما بالكدب و الخديعة و الغش و الخيانة و إن ما نفعش يبأه بالبلطجة، أمسك عيل لسه ف اللفة سواء ف القوة أو ف الخبرات و أعجنه، قيسوا على كده طفل أو ست عايشة بقيود إجتماعية معينة أو راجل عايز يعيش و مالوش ف الخناق و لا له قدرة عليه، الرغبة ف الحياة ف سلام عند العالم "العباقرة" دول غباوة، ماهوه من شراستهم ماعندهومش حاجة يعرفوها و لا يعيشوا عشانها إلا الخناق و الحرب، أولاد مارس إله الحرب، و المصيبة إن العالم الشرسين دول دايما يلموا حواليهم الأغبيا و يدوهم إحساس زائف بالأهمية بإقناعهم بنظرياتهم دى و إن الخباثة دى قمة العبقرية و بكده يعملولهم غسيل دماغ و يحولوهم للخدامين بتوعهم، إيديهم و لسنتهم، زى مانا شايفة حواليا كده، و يسيبوهم يتزاوجوا يتكاثروا و يشبعوا الناحية الآدمية اللى عندهم، لإنهم مش شرسين بالفطرة هما أغبيا و أسيادهم بيعلموهم الشراسة، و يدوهم فلوس و يخلوهم يعيشوا ف ترف و ساعة الجد آخرة خدمة الغز علقة، يحطوهم ف وش المدفع و يشيلوهم بلاويهم كلها، بيبقوا أدواتهم و الماريونتس بتوعهم، مثل صغير: بتوع الأمن المركزى، أبطال إسمع يا دفعة و البرىء، عيال فلاحين و لا يفهموا حاجة و يعلموهم الشراسة و الإجرام بإنهم ياخدوهم من ما تحت الحضيض يدوهم الحد الأدنى من المعيشة الآدمية و يبقوا حائط الصد بتاعهم و ساعة الجد العدد ف الليمون و دول حاجة ببلاش كده، يعنى خلاصة الكلام المتفوق اللى بجد حيخللى الناس تسمع كلامه بالحسنى و من نفسهم لإنه فعلا متفوق عليهم و مش محتاج يفرض تفوقه بالعصا و السكين، لإنهم حيلاقوا مصلحتهم المادية و المعنوية بتتحقق معاه لإنه أقدر من فيهم على إدارة شأن بعينه و عنده القدرة كما على إختيار مساعديه، من يشاورهم و يكملوه لإن مافيش بنى آدم يقدر يدير دفة حياة أخرين لوحده، لإننا، و دى أهم نقطة، إتخلقنا لنتكامل مش نتصارع أو نتسيد على بعض، الحياة لن تسير دفتها للأمام إلا كده، بأى طريقة تانية كل حاجة بتتقهقر و بتفشل، الناس هما اللى حيختاروا المتفوق و يحافظوا عليه فيما عدا بعض مثيرى القلاقل، أما اصحاب عقدة التفوق فأغلب البشر عندهم مثيرى قلاقل لأنهم أصحاب مصالح شخصية مش أصحاب رؤية و أخلاق عشان كده ما عندهمش إلا العجين و الضرب و التعذيب و التنكيل لآى معترض مش عايز يعيش بالحرام و يغش عياله و مراته ف فرشته عشان يسيبوه يعيش، الهول الأعظم "يوم يفر المرء من أخيه و صاحبته و بنيه لكل يومئذ شأن يغنيه" هى دى طريقة حكم آلهة الحرب، بث الرعب فى قلوب الخراف، و الإعتماد على إن فعلا معظم البشر خراف، بس لو سسنا الخراف دول بالحسنى و الحزم ف نفس الوقت حيكون أحسن للجميع لإنهم لما يشبعوا حيسكتوا من نفسهم و الحاكم و المحكوم حيأمنوا و تزدهر حياتهم و حياة المجتمع ككل، لكن كتر التنغيص يعلم الترفيص، الكاماكازى و ربط آحزمة المتفجرات حوالين الوسط و الإنتحاريين و "الإرهابيين"، يا عباقرة، نفسى بس أصحاب النظريات دى يتعظوا باللى حصل لكريستوفر ريف، ما بين يوم و ليلة الرانك بتاعته ف سوق البنى آدمين، و ده بمقاييسهم هما، نزلت من سوبرمان لفيجيتابل، مش بقول كلنا بنى آدمين المنجول زيه زى أينستين ف الحاجات دى، ف الوير آند تير، يبقى حد ضامن؟! ما تخليك بنى آدم أحسن بالحسنى و بلاش نمردة! على الأقل عشان الإحساس بشماتة اللى حواليك ما يقتلكش لو حصلك حاجة، و الله الضمير المرتاح نعمة، أقسم بكل شىء له أهمية ف الدنيا إنه نعمة النعم
- كلمتين جم على بالى من كام يوم و قصداهم و مش غرور: كل اللى عندك تراب، أنا بس اللى لها قيمة ف الدنيا، و عمرى ما حبقى بتاعتك، نكاية فيكوا يا عباقرة، إنتوا اللى رميتوا النعمة ف الأرض و دستوا و دوستوا الكل عليها، تبقوا ما تستاهلوش النعمة