خير الجند

امبارح على مباشر مصر جابوا نفسانى، المهدى باين، عمرى ما سمعت عنه قبل كده، بيعمل بورتريه لشخصية مبارك، بيشرح ع الأصح، لا يتميز بأى موهبة، ضعيف الشخصية، اللى كانوا بيطلقوا عليه حكمة فى وسائل الإعلام ده عدم قدرة على إتخاذ القرار، راجل عنده إنسكيوريتى و ده اللى كان بيخلليه يبعد عن مواجهة المشاكل و يجمد المواقف بدل من حلها!! و إن الشعب الواعى كان حاسس بكل ده و على مر التلاتين سنة ده واضح فى نكته!! صحيح العجل وقع هاتوا السكين!! و يا شعب يا واعى يا عظيم بدام بحنكة و عظمة حضارة العشرتلاف سنة و باللماحية و الذكاء من أول يوم كنتوا بتنكتوا ع الراجل، سكتوا عليه تلاتين سنة ليه؟! لما ألف ف هولوكوست القطر و خمسمية ف محرقة قصر ثقافة بنى سويف و الف ف مدبحة العبارة و خمسمية ف مسحقة الدويقة اتقتلوا ده غير الفكة اللى بعشرات الآلاف اللى ف حوادث تانية سببها الطرق اللى ما تصلحش لسير البهايم و بيمشى عليها عربيات سرفيس زى ماهى لإنها طرق أقاليم مش طرق الساحل و للا مشاتى سينا و للا الشرم، و للا التسيب فى كل المرافق لدرجة الرى بمياه الصرف و إختلاط المياه بمياه الصرف و صريخ قرى بأكملها من الكوارث دى و كالعادة ف كل المشاكل فى البلد دى فى أى حقبة من الحقب يتعمل أزعرينة عنها كام يوم فى وسائل الإعلام و بعدين و لا حس و لا خبر و يندفن الموضوع و يتكنس التراب تحت السجادة بنفس طريقة التعامل مع كل المشاكل و الكوارث ف البلد دى بدلا من إزالته و تنظيف بيتنا، ده غير الملايين اللى مرضوا بالفشل الكلوى و التهاب الكبد الوبائى من المبيدات المسرطنة و المياه الملوثة، كل ده على مر تلاتين سنة كان بيحصل ما حدش حاسب هذا الغير قيادى الغير ذى شخصية ليه؟! على خلاف كده تماما فيما عدا بعض المثقفين و اصحاب الوعى و الذمم النظيفة من مختلف الفئات اللى كتير منهم نكل بهم بسبب إلتزامهم و عدم تواطئهم مع الفساد و المفسدين، الباقى كلهم، حكومة و شعبا الهوا ضعيف القدرات ده العديم القدرة على إتخاذ القرار، إزاى؟ بالطاعة العمياء بل و المديح و استحسان كل قراراته، خوفا و طمعا، خوفا من سطوته و طمعا فى عطاياه، يبقى مين المفسد؟! مين اللى أفسد الخليفة المنصور بتنفيذ كل شطحاته حتى أطلق على نفسه الحاكم بأمر الله؟! و مين اللى بيهربد للحاكم خصومه بمجرد التشنيع عليهم فى وسائل الإعلام و نشر أكاذيب عنهم تحط من قدرهم فى مجتمع نمطى زى ده؟! إنصر أخاك ظالما أو مظلوما و للأسف شعب مصر لما مش بينصر حكامه الظالمين بدون إدراك و بقصر نظر شديد لا ينصر نفسه، بل يضر نفسه و اللى حصل على مر العصور ابلغ مثال، و عشان كده الثورة الفرنسية من يوم حدوثها من اكتر من متين سنة، من غير وجود إنترنت و لا حتى تلغراف، فى تقدم و الكل بيجنوا خيراتها، و هنا كل خمسين سنة فى ثورة، الشعب لازم يستوعب أسباب اللى بيحصل و حصل على مر التاريخ فى مصر و إلا ميعادنا كمان خمسين سنة مع ثورة كمان

أمثال

كفاية هم من عالم ما عندهمش دم