المخطط

فى مخطط واضح جدا لإغراق البلد دى فى هوس جنسى تخلفى رجعى مسف مغرق ف الإنحطاط، قناة الفراعين بتقدم برنامج بيعبر عن كل ده، معرفش مسميينه إيه و لا بييجى الساعة كام، لكن غالبا بييجى الأحد لإن بالصدفة و انا بمر ع القنوات النهارده شفت يدوبك دقيقتين منه و كان مكتوب إعادة، الدقيقتين كانوا كافيين إنى أغير المحطة على طول، كان المذيع المثقف ف محطة النائب فى مجلس الشعب عن الحزب الوطنى قاعد ف وسط ستتين، واحدة اللى دايما لابسة إسود و جوانتى و ضئيلة أوى و دايما تتكلم عن مواضيع الجنس و الكلام ده و التانية متهيألى دكتورة ف الشريعة دايما تلبس نضارة نظر غامقة، المهم الكلام كان عن خيانة الست الزوجية و أول ماسمعت سمعت المذيع بيقول لكن فى رجالة يقولوا ما افضحش أم بناتى، فكان رد الاتنين الهوانم العفيفات فورا ده يبقى ديوث!!!!!!!!!!! فالمذيع قال لكن ف حالة الراجل ما الست بتسامح فانبرت الدكتورة أم نضارة و شرحتلنا إحنا الحمير عديمى العفة و الشرف إن الست هى اللى عليها عبأ العفة و العرض!!!!!!!!!! أنا سمعت كده من هنا و رحت قالبة المحطة، بالسلامة، يعنى الراجل من دول لما يجيله العقل و الحكمة إنه ينفصل عن مراته عشان بهدوء و من غير شوشرة لو حاجة زى كده حصلت عشان فعلا ما تلزقش ف بناته بالذات، لما يلاقى روحه بيشتم شتيمة بالشكل ده يبقى يضرب نفسه مليون جزمة و يروح يعمل غدنفر و يعمل لمراته قضية زنا عشان البهايم دول يرتاحوا؟؟؟؟؟؟؟؟؟؟؟؟ يعنى قناة زى دى عشان الدعاية تقبض عالم أرزقية زى دول عشان يطنطنوا بكلام فاسد يفسد المجتمع و بعدين قناة زى العالم ممكن المنار و الأقصى كمان يتقفلوا و قناة بالقذارة دى تفضل مذاعة؟؟؟؟؟؟؟؟؟!!!!!!!!!! البلد دى لو ما اتلحقتش، آدى النهارده سمعت ف الجزيرة ف برنامج عن معدلات البطالة ف العالم العربى إن ف مصر البطالة بين اصحاب المؤهلات العليا عشر مرات قدها بين المؤهلات المتوسطة أو أقل، آدى المخطط التخلفى الفظيع اللى بتتغرق فيه البلد و المنطقة كلها، موجة من التخلف عشان نبقى كلنا شوية سياس على بياعين انابيب و فراشين و دادات و سرفانتس و نتسحب من قروننا بمنتهى السلاسة و السهولة عشان أسيادنا ما يتعبوش ف سواقتنا، الله يلعن اللى ساكتين على كده، و يلعن اليوم اللى يتعالج فيه اللى فوق التمانين بالملايين بره من كتر ما متبتين ف الدنيا و الشباب هنا مرمى مش لاقى لا علاج و لا معيشة و لا حياة من أصله، يلعن أبو دى بلد و العالم أهلها اللى ولا أهل الكهف