دردشة على البحر

سمعت زويل ف العاشرة مساءا على دريم و هوه بيكلم على الدى إن إيه و الجينات، و على إن كل منطقة ف حبل الدى إن إيه بتمثل خصلة ف البنى آدم، و إن مش الذكاء أو الأمراض أو الملامح الجسدية بس اللى على الحبل ده، لكن إكتشفوا كمان إن بعض المناطق اللى كانوا فاكرينها "صحراوية" على الحبل ده تحمل "أخلاق" البنى آدم!! يعنى الصدق أو الكدب أو الضمير!! و إن الإجرام أو الطيبة دول لهم بيتحددوا للبنى آدم على حبل الدى إن إيه بتاعه!! المهم إن الناس بتوع العلم دول يخترعوا يخترعوا و بعدين كل ده تاخده آلة الحرب, قمة إنجازات البشرية كلها إستهلكتها آلة الحرب و لا شفنا إلا خير بسيط منها، ألة الحرب اللى مش شايفة ف البنى آدم ده غير ماكنة تستخدمها ف التضخم و تحقيق أهدافها، دلوقت العلم عايز يتعامل مع البشر كأنهم فعلا مش أكتر من مكن، شوية إنزيمات على شوية هرمونات و اعمل بنى آدم، و زى ما بتاخد حباية للصداع بكرة كمان يخترعوا حباية للأخلاق، تاخدها لما يجيلك مزاجك و لما تبقى الظروف مش طالبة الأخلاق تبطل تاخدها و ترجع لأصلك، و اللى بيقتل و بيسرق يقول و انا ذنبى إيه، ده الدى إن إيه هوه اللى بيخللينى أعمل كده، و اللى يطفح الكوتة عشان يعمل الصح اللى زى دول يقولوا عليه مالوش فضل ف اللى هوه بيعمله، ده الدى إن إيه اللى مخليه مستحمل البلاوى دى كلها، و لا تلمنى ده الدى إن إيه طايلك و طايلنى!! و نعيش بأه ف جوثيكا و أرض النفاق و تبقى دى هيه الحياة!! بالذمة ده كلام؟! يبعدوا أحسن عن المشاعر و الأحاسيس و خليهم ف اللحم و الدم و الأمراض كفاية، بلاش لخبطة ف حاجة عمرها ما حتتفسر بمعادلة، إنما الروح من أمر ربى و خلاص، بلاش عك، العالم دول سفهاء و للأسف لما بيحصلوا على القدرة بيفتروا بيها مش بيتصرفوا بعقل و لا أخلاق، فخلينا ف العلاج و السليم نبعد عنه، الشر نلاقيله دوا و الصدق و الخير بدام ماشيين بلاش نعك فيهم و نفتى بفتاوى ما لهاش لزمة، إف إت إينت بروكن دونت فيكس إت، بلاش عك ف مخاليق ربنا. أنا بكتب الكلام ده ستاشر فبراير م العين السخنة، رحنا كلنا من يوم الحد و راجعين يوم الخميس و مافيش انترنت، لو خط التليفون جه بكره ححطه على البوست يا إما أما أرجع مع شوية صور ظراف من هنا، هابى فالانتين.

رجعت إمبارح، اللى ف الصور جود أولد مى، سوسو و قشطة ف البلكونة ف مصر ف حالة وئام، قشطة ف بلكونة البيت، ع البحر عمر و ليلى و نادية الست بتاعة أختى من خمسة و عشرين سنة بيصطادوا سمك، اصطادوا شوية بساريا