سرفز ذيم رايت

هبة قطب امبارح على النايل لايف "مافيش حاجة اسمها غشاء بكارة"!! "بدام قالت إنها بكر تبقى بكر" "النزيف ده من العافية و الغشومية" أؤيد و أشجع و أحيى، قالت كمان كلمة مظبوطة أوى اللى فيها ملخص كل ده "نتقى ربنا ف أعراض الناس عشان الناس تتقى ربنا ف أعراضنا" بس كده، هوه ده مجمل القول، اللى عايز البكر يبقى هوه كمان بكر، لكن لما يبقى مانشيت جريدة معارضة "الشباب يطالبون بفحص الفتيات قبل الزواج لكشف غشاء البكارة الصينى" أظن عيب أوى نوصل للسعار الجنسى ده لدرجة إن الصين بأت تصنعلنا سجاجيد صلاة و أغشية بكارة!! بأه منظر غريب المجتمع ده اللى الشاب من دول فيه مقهور ف كل حاجة لحد المسجد اللى أسرى منه النبى بتاعه مهدد بالهدم و عشان يحس إنه لسه مش كرودية بعد كل ده بقى يدور على اللى ماحدش خمه و ركبها من قبله و كده يبقى حاسس أنه عايش أسد ما بينضحكش عليه!! للأسف الستات بقوا الحيطة المايلة اللى الرجالة الشرقيين بينفسوا فيهم عن قهرهم من طوب الأرض، من الحاكم و اللى بيحكمه للرئيس ف العمل، الأول كنت فاكرة إن غشاء البكارة الصينى ده ميتافور للعمليات أتارى ده فى حاجة كده فعلا بيتباع ب اتنين و تمانين جنيه، يعنى ف الوقت اللى فيه أحد رموز دينهم العظمى مهدد بالتدمير يطلعوا ف التليفزيون و الديش يكلموا عن غشاء البكارة و مشروعية النقاب ف الفصل المدرسى!! و دى القضية اللى بيتكلم فيها شيخ الأزهر إمبارح على دريم و لما سألته الست على مصافحته لبيريز استعبط و قال و هوه فى نص ف القرآن يمنع مصافحة أى حد من دين تانى!! و هوه انت يا شيخ مشايخ الإسلام ف مصر سلمت على أى يهودى و للا على صهيونى عريق ف الإجرام من مدبرى مذابح إخوتك العرب المسلمين؟؟ ف حين إن العوا يوم الجمعة كان عقلانى و محدد و واضح تماما و قال بصراحة إن الوضع ده لن يحل بغير القوة و السلاح، ندمانة أشد الندم على العمر اللى راح هدر ف منظومة السعار اللى هنا دى.