السعار

الأرندلى: مجوز تلاتة و بيدور ع الرابعة أيا كانت الأسباب، و بمناسبة ايه الفخرانى يعنى يتهبلوا عليه كده؟؟!!

الباطنية: مجوز تلاتة عشان الولد و بنته بقدرة قادر فضلت عشر سنين مستنية جوزها اللى اجوز عليها طليقة أخوها!! لحد ماخرج ما السجن عشان يرجع يخونها تانى، و بنته التانية اترهبنت بعد ماجوزها الفلاتى اللى كل يوم مع واحدة عزرائيل افتكره و مفروض يبقى عمل فيها جميلة، بس نعمل إيه "للنسوان" اللى عاملين زى السجاجيد كل ما تدوس عليهم ينعموا
كلام "نسوان": عنوان يعبر عن المرحلة التى أتى فيها و يستهل المسلسل أغنية بها كوبليه "لا دموع مع فرقة و لا ذكريات بتروح، ضل البيوت إبقى لما تضل الروح" و لما مع الكوبليه ده بأه نلاقى واحدة عاملة زى الرقاصات و هى رقاصة فعلا بس مفروض انها ليدى و بزنس وومان ف المسلسل لكن شكلها و لبسها كأنها مش شايلة هم ف الدنيا غير حق الفراش لجوزها، لما هذه الرقاصة/ليدى/بزنس وومان، يعنى وندر وومان كده، جوزها بيجوز عليها كل شوية و التانية اللبنانية السمهرية جوزها بيبصبص لمدرسة ولاده ف الحضانة و بيقول على روحه خالهم، يبقى كده الكوبليه السابق يتشال و يتحط بداله "قطعنى حتت و اقلينى ف الزيت، قطعنى حتت انا ملك إيديك" يعنى نتشال نتهبد نتخان يتلعب بينا السيجة احنا نسوان و ضل أى دكر جيبه عمران و لا ضل حيط
خاص جدا: جوزها بعد عمر مديد عرف واحدة عليها و بعدين اجوز هى أو مش هى مش عارفة، و اخوها ابن الناس بيخون مراته مع رقاصة/بزنس وومان برضه و بيشم!! مع العلم إن كل ده من كام حتة ف مختلف الحلقات مش من متابعة منتظمة، كان يجيلى شلل اكتر م اللى عندى
ما تخافوش: جوز الأخت اجوز عليها الممرضة للسبب الآزلى اللى دايما الرجالة الخاينين/مظلومين يتحججوا بيه ف المسلسلات، و هوه إن مراته متعالية عليه، لكن زى الباطنية كده النسوانة من دول لما جوزها يخونها مع طوب الأرض تفضل مستنياه "عشر سنين"!!!! و تجيبله حمام ف السجن، اكتبوا يا رجالة يا محرومين للرجالة المحرومين اللى زيكوا
المصراوية: اللى من أول جزء و حكاية العمدة الحمش مع البرنسيسة المسهوكة و مش نزلالى من زور، ما لقتش غيرك يا فلاح يا جوز الأتنين تتجوزه و ترضى تعيش معاه ف الأرياف حتى لو عزلت بعد كده، حتجوزك تقضية وقت كده فانتازيا كام يوم و بعدين ترجع لحياتها مش حاضر و يا حبيبى يا توحة، جكوا خابط، و جه الجزء التانى دمه كمان اتقل من الاولانى مليون مرة، و قال البت الصغيرة هيمانة بالفلاح العجوز ابو البرنسيسة، احلموا يا كتاب يا محرومين و اكتبوا للرجالة المحرومين خليهم يعيشوا ف أوهام شهريار و الحرملك بتاعه و الراجل من دول ينطس ف عقله و يروح يجوز ع الولية و يخرب الدنيا م الأوهام اللى متحاصر بيها سيما و مسرح و تليفزيون، بعدين ايه المأساة الإغريقية اللى عاملينها من عيشتهم ف كوم مش فاهمة إيه و هى ف كفر الشيخ، يا عم إنت مش عمدة و باشا و مليونير، ما تدخل ف الكفر عندكوا مية ونور و تعيشوا سوا؟! متهيألى ممكن برضه تنفيذ موضوع زى ده بنفوذه و نفوذها مجتمعين
بنت باشا: هانم هانم نازلة ضرب و قتل ف اللى ييجى ف سكتها، قتلت البودى جارد و قال إيه!! ضربت البت المليارديرة ف مكتبها ف "المجموعة" و هى بتكلم صاصا و طلعت م الموضوع كله صاغ سليم؟؟!! دريم أون، ماهى المسلسلات اللى م النوع ده معمولة لمداعبة الأحلام الطبقية لبنات العشوائيات، زى فيلم "خادمة و لكن" كده اللى الشغالة إجوزت فيه الملياردير و بقى عندها شقة و عربية سوبر لوكس و على بابا بعد الضنا، و ده كله فى تجاهل تام للواقع اللى الكل عايشينه و بنات العائلات بيتعمل فيهم إيه لو دافعوا عن نفسهم بس بالكلام!! جهنم و بئس المصير للمارقة
قانون المراغى: الراجل مجوز عرفى على مين؟! انوشكا!! كتير أوى معلش حتى لو كانت غادة عبد الرازق الهيمانة ف حبه!! إسملله، دريم أون يا رجالة، يا حبيبى الجوازة التانية دى دايما بالجيب، لو جيبك فاضى ابقى قابلنى وين هيل فريزز أوفر لو واحدة عبرتك، دريم أون يا رجالة مصر و خليكوا ملهيين ف أحلام شهريار اللى الإعلام عمال يغذيها بوضوح فج و امتى؟! ف شهر العبادة و الصوم عن الملذات، خليكوا نايمين ف المهلبية لحد ما تصحوا تلاقوا المارينز فوق راسكوا و مكوشين على ستات البلد كلهم، و ستاتكوا اولهم يا اشاوس، هى هى هى ثم كمان هى

حرب الجواسيس: معقولة و منة شلبى صراحة لايقة فيها و فيها مناظر حلوة، بس اليهودى الستيريو تايب غبى أوى، فى يهود بيكلموا كده؟! معرفش
ما صمتش ف رمضان ده كله غير يومين و يوم فيهم خدت مهدىء بشوية مية و كملت صيام، حقيقى اجهاد ع الأعصاب مع إنى بصوم من سبع سنين و ما لخبطتش ف الصيام غير يمكن من أربع سنين بس، هوه تعذيب و السلام بس عادة بأه، يمكن السنة الجاية، بكره العيد كل سنة و الجميع طيبين