ع الماشى

- خطاب القذافى ف الأمم المتحدة كان يحتوى على افكار كويسة جدا بالرغم من أسلوب المتحدث الأشبه بكوميديان بيأدى فقرة و كل شوية عايز ينتزع تصفيق و ضحكات الأودينس، يعنى لو الكلام جد و اللى بيكلمه يهمه تاثيره فى نفوس الحاضرين مش مجرد الرجوع لبلاده عشان يبدأوا فى الإنشاد و التغنى بشجاعة القائد زعيم الثورة اللى وقف قدام أمم العالم و قالهم بالفم المليان إنتوا ديكور، لو الهدف هو مخاطبة العقول و إحداث ثاثير فعلا مش، رحت اتغديت و جيت، رز و لوبيا و أنجر سلطة وبحلى دلوقت ميجا نستلة بالشوكلاتة، طعمها جميل أوى و بحبها جدا، فالو المقصود التأثير مش البروباجندا و لفت الأنظار كان اهتم بإيجاز الكلام عشان الناس ماتملش و تفضل تصقفله و تضحكله عشان يفرج عنهم و يخلصوا، كان بيكلم كأنه قاعد ع المصطبة ف بلدهم و بيحكى، فالأفكار جميلة جدا، تغيير الأمم المتحدة و تعويض أفريقيا عن الإستعمار و الديمقراطية للجميع مش لحد وحد!! هأهأ!! فهنا لابد أن توقف و نذكر إن الكلام عن الديمقراطية للجميع لما ييجى من وحد كاتم على أنفاس شعب بحاله بقاله اربعين سنة و بيعد لتوريث الحكم لإبنه يبقى ده كلام طق حنك و دش و فاصل من الكوميديا الثورية أو الثورة الكوميدية على الأصح
- شفت على مباشر واحد اسمه حنا معارض تونسى عايش ف باريس و رئيس مش فاهمة الحزب الشيوعى التونسى و للا الجبهة الشيوعية و فهمت من الحلقة إن التوريث شغال ف تونس كمان!! إيه ده بالظبط مش فاهمة؟! سوريا و عايزين من بعدها مصر و ليبيا و تونس!! هى المنطقة دى بقت حظيرة مواشى و للا إيه بالظبط؟! مش قادرة أفهم حقيقى هى حاجة ف الجينات بتخلى طوب الأرض يركبنا كده و للا إيه؟؟ ده كل الحكاية الناس تخرج الشوارع و تبرك فيها ما تقومش لو جابوا حتى الجيش، و يا إما العالم المومياوات دول هما و اللى معاهم يمشوا يا إما قاعدين ف الشارع و تقف عجلة الإنتاج و اللى عايز يخاطر بأه بإنهيار إقتصادى، مجرد الناس تبطل تروح الشغل و العيال يبطلوا يروحوا المدارس و يعملوا عصيان مدنى و الحياة تتوقف لحد ما الكابوس دول يرحلوا أحسن ما بالشكل اللى ماشية بيه الدنيا هنا ده الحياة حتتوقف حتتوقف بس بعد حصول كارثة!! ما فيش حل تانى، الناس لازم تتحرك لإن الموضوع بقى كارثى و الوضع بأه ف منتهى العجب الجمهوريات اللى بقت ملكيات و العالم اللى طلعوا من القاع عايزين ينصبوا انفسهم ملوك بالعافية و كمان ولادهم و احفادهم و الإسم نظام جمهورى!! دى بقت عزب و اقطاعيات مش بلاد دى!!- شفت على مباشر ما يفترض بأنه أول صلاة للمسلمين أمام الكونجرس، كان مذكور إن المصلين بالألاف لكن ماشفتش الموضوع ده، كل اللى شفته كان فريك شو، عالم عاملين زى ما يكونوا ف سيرك، واحد لابس عباية و عقال سعودى و التانى محنى دقنه احمر نارى، يظهر كان حاطط شاى للحنة، و عالم لابسين لبس الأفغان و كل اللى ناقص السيرك ده ناقة و نلاقى روحنا ف البيداء من الف سنة، كان ناقص كمان واحدة ببرقع عشان الصورة الكوميدية للإسلام بتاعة الأمريكان تكمل و اكيد ف الجمع ده كان فى منقبات، صرعة، زيها زى الجاى باريد بهدومهم العريانة دول كمان عاملينلهم منظر أنتيكة زى بتوع السيرك، و آدى الإسلام اللى عايزين يقدموه بالشكل المسخرة ده و بعدين الغرب يحترمه، و بالتأكيد بدام مسلم و مسلم أنتيكة لازم يكلم عن تكريم المرأة و إزاى يقبلوا الناس عمل المرأة بالدعارة و إن يبقى فى خطوط للدعارة و نشاطات دعارة يبيحها القانون، عشان عايزين نكرم المرأة على طريقة الإسلام و بدل ما تبقى بتشتغل بالدعارة و تاخد فلوس و تبقى مثلا آسكورت سيرفيس القانون يحميها تبقى حريم و حرمة و مرة زى ما سمعنا ف مسلسلات رمضان السنة دى و واحدة من كوشة زوجات زى ما شفنا برضه بدل ماهى واحدة منفردة مالهاش شريكة مكرمة بالقانون الوضعى الغربى و لو خانها تخونه ما عليها من ملام و البادى اظلم مش المسخرة اللى بتحصل عندنا و هوه يتصرمح على حل شعره براحته و هى يتعملها قضية زنا و تتحط ف السجن، و تبقى خدامة و عبدة ف البيت و شهادتها بنص راجل و ميراثها نص راجل و خلفة البنات تبقى نكد ع الست عشان طوب الأرض حيدخل ف الميراث و كل النظام الإستعبادى ده، الدعارة أحسن مليون مرة، على الأقل بتاخد فلوس مش بتمارس الدعارة ببلاش و تعامل معاملة العبيد تحت غطاء شرعى اسمه الإسلام