الرصة

كل بنا و ليه رصة، الهرم طالع نازل ليه رصة و البيوت ليها رصة تانية، كل البنا كده، و الكلام راخر بنا، فيه كلام أوله طالع و آخره نازل زى الهرم عامل زى الخازوق ف ودان اللى يسمعه، و فى كلام زى البيوت اللى يسمعه يعشش فيه و يرتاح، و انا أولى الأمر اللى خدوا الدنيا كلها بالطالع نازل واللف والدوران حكموا عليا كل الكلام عليا يبقى من صنف الكلام الهرم، كل ما سمع حد بيكلم و بالصدفة يغلط و يكلم كلام إيجابى بتاء التأنيث تلاقيه يتلجلج و يلحق نفسه، لازم يحط آخره كلمة من مفردات تعذيبى، يعنى لازم آخر الكلام يبقى نازل بعد ماطلع، و للا لو كلامه و للا كلامها هرمى الشكل عن عمد، يعنى آل بنلعب بعقل المغفلة، ننفخ فيها لما تطلع فوق بعدين نهبدها على رقبتها و نعد نضحك بعدين نعمل وش جد و نكلم بكل احترام عن اللعبة اللى اترمتلنا عشان نعمل عليها فونتات، و المهم ان اللعبة دى استخدموا كل صنوف الغش و الإنحطاط ف اللعب معاها، ضربوها ف ضهرها و بعدين كتفوها بايدين اقرب الناس اليها عشان اللى ماشى ينط على جتتها، عملوا م الحبة قبب ف اللى يتعبها و اللى ف مصلحتها قفلوا عليه بالضبة و المفتاح و لا كأنه ليه وجود اصلا، و فوق كل ده و ده الأهم إنهم قفلوا بقها عشان ما تفتحوش و تدافع عن نفسها لإنهم عارفين كويس أوى إنها ساعة ما بتكلم لو حد م اللى بيسمعوا ف وشه نقطة دم مش حيقدر يفتح بؤه ليوم القيامة، فراحوا قافلين بقها و ريحوا نفسهم، و بأه كل اللى عايز يعيش من غير ما ينداس عليه لازم يدوس عليها هى، بأه واجب قومى و ناشيونال سبورت، لحد مابقيت اتفرج على ناس و لا اعرفهم و لا يكون ف يوم م الأيام فرصة إنى ارد عليهم و الاقيهم بيرصوا الكلام على حسب الموضة، الموضة اليومين دول فراخ عمالة تتريأ لما تتقلب على ضهرها م التريأة يبقى كل اللى بشوفهم بيكلموا ماشيين ع الموضة، رجعت الفراخ تتكلم غير سفالة زمان يبقى الموضة نقلل م السفالة و نرص الكلام بدل ما كله نازل بقى زى الهرم، نصه طالع و النص تانى نازل، لحد ما تيجى الفرصة و نرجع لفحت البير تانى، آل يعنى البعيدة مغفلة حتصدق أى حلاوة من اللى عاملين فيها كل ده، بقت رصة الكلام نصه طالع ده كويس و ده كويس و نصه نازل بس اصل كذا و كيت، و المهم ان كذا و كيت ده من أثار التعذيب المجنون اللى اتعذبته، عمر حد طبيعى بعقله شاف حد يعاير حد و للا يحسب عليه عمل ايه و هوه بيتعذب؟؟!! فصنف المعايرة بتاعة العالم دول من صنف فكرتى ف إيه و انتى عندك انهيار عصبى و بتهلوسى!! كفاية بس ف أخرة الجنب الطالع بتاء التأنيث نحط جملة زى "اوعى تفكر" عشان نهبد اللعبة على جدور رقبتها، دى بقت معايرة الجبانات اللى ماعندهمش حتى اقل قدر من الذمة يخليهم يواجهوا ضحيتهم، و المهم إن كل اللى حصل حبة اتعمل منها قبة و واحدة من جرجرتها و عرضها بالعافية غصب عنها قدام طوب الأرض و هى ف الظروف دى جالها جنان و حريق ف نفسها من كتر الظلم!! فعشان هما ناس حقانيين لازم دايما يقولوا كل واحد ايه له وايه عليه، فمن كتر حقانيتهم لازم يقولوا ان الضحية "فكرت" ف كذا و كذا و سكاكينهم شغالة فيها تقطيع، ف "قالت" كيت و كيت و كيت، ما اصلنا حقانيين ما بنجاملش حد، فا اللى اغتصب عمل كيت و كيت بس المغتصبة راخرة عملت كيت و كيت، الحق حق!! من صنف كده كلام زى لا داعى لاستعمال اسرائيل القوة المفرطة ف الرد على هجمات الفلسطينين و المذكورة قاتلة و مقطعة حاجة بتاعة خمسميت روح من الفلسطنيين عشان صاروخ نزل ف الصحرا ناحيتهم، الإسرائيليين، من حماس اللى مفروض لو حد عنده دم يساعدهم ف تحرير أرضهم مش ينكر عليهم حق المقاومة، فكده يبقى الناس الحقانيين قالوا للحرامى و المسروق كل واحد فيهم اللى ليه و اللى عليه و بقى المسروق غلطان زى السارق و المغتصبة اللى جالها انهيار عصبى و اجننت غلطانة هى راخرة زيها زى المنحط اللى اغتصبها!! و نعم الحق و الذمة!! ماهوه ده صنف الذمة اللى خللى واحد زى ساركوزى امبارح ف مجلس الأمن يرد على أوباما اللى بقى عامل زى خيال المآتة اللى عمالين يرصوا ف مثل عليا على لسانه يغسلوا بيها وشهم فترة بعدين يرجع ابن اللئيم لعادته القديمة، ساركوزى الواقعى الحقانى رد امبارح على دعوة خفض الأسلحة النووية ف العالم بإن خلينا واقعيين و احنا عايشين ف الواقع، ازاى ينطلب منا الطلب ده و ايران عمالة تخصب ف يورانيوم؟! ازاى و ايران بتهدد بازالة اسرائيل؟! و هى اسرائيل دى ما جتش زالت فلسطين م الوجود يا اصحاب ذمة ابجنى يا كوهين تجدنى؟! هى اسرائيل دى عمرها كام سنة و فلسطين عمرها كام سنة؟! ستين سنة قصاد أكثر من ألف سنة!! يبقى كل من سرق سريقة يطرمخ عليها بكام مليون و بقت بتاعته باعتراف اصحاب ذمم من صنف ابجنى تجدنى؟! اسرائيل دولة محتلة و استعمارية، من امتى الاستعمار بقى مشروع مش فاهمة؟! و لما ايران تحاول تلحق تنتوفة سلاح نووى م اللى عند اسرائيل و ساركوزى باشا تبقى ايران هى اللى بتعطل السلام و نزع السلاح النووى؟؟!! أما غريبة حقيقى حال الناس دول، بالتأكيد اللى ذكر ف الصحف عن قمع احمدى نجاد للمعارضة و تعرضهم للتعذيب ما يرضيش حد ابدا و ممارسات ديكتاتورية مرفوضة لو كانت صحيحة، و كمان عدد الجموع اللى خرجت يعبر عن ان جزء كبير من الشعب رافض لأحمدى نجاد، و ممكن يكونوا رافضين للحكم الإسلامى نفسه و زهقوا منه و هما ف قلب أوروبا، ده احتمال كبير، لكن ما ننكرش ف نفس الوقت إن أحمدى نجاد فى خضم معارك مصيرية مع الغرب و تدخل الدول الغربية لخروج المظاهرات عن السيطرة احتمال وارد بنسبة مية ف المية، مش ممكن حيشوفوا قدامهم فرصة زى دى و مايدخلوش لازاحة البعبع بتاعهم باى وسيلة، لكن التعذيب مرفوض و واضح ان فى شبهات ف الوضوع بدلالة موقف خاتمى اللى أيام حكمه لم ترتفع أى شكوى منه. المهم إن العدل و الذمة دلوقت بقوا خاضعين لمبدا أو بالأصح لا مبدأ أبجنى تجدنى، دى الشريعة اللى خلت ساركوزى ينكر إن إسرائيل دولة إستعمارية و حقيرة بتمارس ابشع صنوف التعذيب على اصحاب الوطن اللى احتلته، و اللى خلت واحدة زى هيلارى كلينتون بعد ما المسيو ساركوزى خلص كلمته تومىء بالإيجاب مرارا و تكرارا ف أعجاب بالحقانية و الواقعية بتاعة المسيو، و اللى خلت المغتصبة بقت بتتحاسب هى راخرة على أعراض الجنون اللى اصابها من وحشية المغتصب و ديوله، الحقانيين