القمار

حلعب قمار لأول مرة ف حياتى و المبلغ عشرتلاف جنيه، بينتس لناس بس بالنسبة ليا انا مبلغ، اللى مفروض حيستخرجلى ترخيص تعلية الدور ف العمارة طالب خمستاشر ألف، عشرة قبل و خمسة بعد، و على حسب كل الشواهد صراحة شايفة إنى لما أشوف حلمة ودنى من غير مراية حيبقوا يسيبونى اكسب قرش، فاعتبرت ان العشرتلاف دول قمار و لو ما نفعش حفضل سايبة ورقى برضه لحد ما يمكن الباب يتوارب ف يوم. مشتركة ف موقع قران من حوالى شهرين، طوب الأرض بعتلى و قبلت اتنين و عشرين دعوة و رفضت قدهم مرتين، منهم يمكن عشرة بعتولى جوابات، و بعد ما ابعتلهم اول جواب "هاى اهلا اسمى الحقيقى نادية مهندسة" بعد هذا التعارف الأولى البسيط لا حس و لا خبر، قصة حياتى على الإنترنت من ساعة ما دخلت البيت سنة الفين، لدرجة ان راجل بعتلى عنده اتنين و ستين سنة، كبير شوية بس البروفيل بتاعه كلاسى جدا، و تنس و اسكواش و صحة و عايش سبعة و تلاتين سنة ف استراليا و فريكوانتلى فيزتس ذير، طيب كويس، قبلت الدعوة، جالى الجواب بتاعه استهلاله "سلامو عليكو ماى سيستر"!!!!!!!! هأ هأ هأ، بتاع استراليا و الاسكواش لما عايز يجوز حيكتب للهنى سلامو عليكو ماى سيستر!! و البروفيل اللى كان مكتوب بإنجليش ما يخرش الميه جاى الجواب ما فيهوش كلمة إنجليزى صح، ماريج كاتبها، أو كاتبينها مياج، المهم كتبتله جواب كفران ده رمضان و اول ما الاقى وقت حكتبلك، كتبلى بعدها تانى يسأل و سايب ايه ميله و موبيله، قلت يابت طقسى مش خسرانة حاجة خلينا نفهم الفولة، بعتله أسأله كام سؤال عادى، كنت بتشتغل ايه ف استراليا و انا ساكنة ف الحتة الفلانية انت ساكن فين، اللى بعتلى جوابين من ساعتها ماردش، طب الأدهى، لما رحت عملت العملية لإشطة، السباينج، اتعرفت على دكتور بيطرى لطيف جدا، كتبلى نمرة موبيله عشان ابقى اسال لو اشطة عايزة حاجة، بعتله اس ام اس فيه السايت بتاعى، كلمنى يشكرلى ف السايت و نبقى نتصل، حطنى ع الياهو ماسنجر قبلت و اكلمنا كلمتين كده يوم الصبح، بعتله جواب كتبتله فيه عن اشطة و سوسو و المزيكة اللى بحبها و سافرت فين و ساكنة فين، ما احنا معانا موبيلات بعض و على الماسنجر سوا، يبقى نتعرف، ما جاليش رد، قلت خلاص، قصة حياتى بتتكرر، خليكى يا زفتة زى البيت الوقف كده عشان نعذبك، ما حطيتش ف دماغى، بعدها بفترة كبيرة ما كانش الإن بوكس ماسنجر بيساين إن ففتحت الماسنجر الأصلى اتسلى، لقيت الأيكون بتاعته دست عليها برضه تسالى، لقيت رسالتين منه!! كتبتله اس ام اس تشك يور ماسنجر آند ميل، كلمنى مافيش حاجة، مش لاقى حاجة عنده!! المهم اكلمنا، بعتله اس ام اس بعدها بيومين و استنيت يتكلم ما اتكلمش، كلمته تانى يوم ماردش، بعتله ع الماسنجر و خلاص، بعدها بكام يوم ألاقيه باعت على الماسنجر مسج ف نفس اليوم اللى بعتله فيه الاس ام اس!!!!!!!! طب ما كلمتش إزاى؟؟؟؟؟؟؟؟؟؟ اهوه عك من ده بأه، دلوقت بعتله هابى عيد من ضمن الباقى و خلاص، خلينى موقوف حالى كده عشان من اتنين و عشرين سنة ابن الباشا كان عايز يحسس و معرفش فاتقل مزاجه و انا استاهل كل اللى يجرالى عشان ما سبتوش يحسس، مش كان يحسس و هى هى هىء يا باشمهندس و خلاص و كان زمانى عايشة ف فيلل زى كل اللى حواليا مش اتنين و عشرين سنة تعذيب ف المعتقل، آدى النسوان و اللى بيحصلهم ف بلد النسوان و شهريار، فالمهم حلعب قمار بعشرتلاف جنيه و ابقى تقريبا ع الحديدة بعدها، يعنى يدوبك حيفضل معايا اول ان اول عشرين تانيين، و نشد الحزام