الجات؟؟

دلوقت كان بيبقى فى أدوية كويسة جدا و بسعر رخيص جدا و بطلوا ينتجوها، فهل السبب هوه إتفاقية الجات؟ يعنى كان فى مضمضة إسمها لسترميكس و كانت عاملة زى اللسترين بالظبط بس كان سعرها عشرة جنية بس، كانت مصرى، و بطلوا ينتجوها، و كمان مضمضة فينوكرامين اللى بربعة جنيه بس و الإزازة الصغيرة مش عارفة كام مللى لتر كانت من كتر تركيزها تفضل شهر، لسه عندى منها إزازة، يعنى لسه مبطلينها قريب لإن كل ما اسأل عليها ألاقيهم بطلوها، اللسترميكس هى اللى بقالها كام سنة، و بعدين كان فى منوم هيبنور بالب التقيلة أم كذا نقطة، كان ممتاز العلبة عشر حبوب بسبعة جنيه، لما كنت بتعب كنت باخد حباية كنت أصحى فايقة، لما كانت تجيلى أو تبتدى تجيلى التشنجات، كان الدوا ده هوه اللى بيحل المشكلة كلها، و مرة واحدة معرفش بطلوا يعملوه و للا دخلوه لستة مخدرات المهم ما بقاش موجود أبدا، طب هوه منوم يدخلوه لستة مخدرات ليه مش فاهمة؟!، حاولت أجيب منوم تانى بداله، جبت علبة إسمها سييستا بربعتاشر جنيه مش فاكرة كام حباية بس يمكن برضه عشرة، كنت بقرقشه زى البومبونى، آخد الحبايتين و ساعات تلاتة و لا لهم أى تأثير، طبعا ماجبتوش بعد كده أبدا، حعمل بيه إيه؟ لحد ما إتكتبللى الزولام باخد منه الحباية الربع مللى جرام لو تعبانة بنام زى الفل. المهم هى إتفاقية الجات السبب ف التوقف عن إنتاج الأصناف الجيدة من الأدوية و بقاء الأصناف الرديئة و للا إيه؟؟