حبظلم بظاظا

متهيألى الجملة دى كانت من إبداعات أحمد رجب ف صور مقلوبة يمكن بس مش فاكرة كانت إيه القصة، لكن لقياها معبرة جدا عن اللى حكتبه. بما إنى دمى محروق بيوند ريكوجنيشون فمن زمان بقيت على قد ما قدر اقفل الأبواب اللى أقدر أقفلها اللى ممكن يجيلى منها حرق الدم، لإن دمى بقى محروق بصفة مرضية اثرت على وظائف عقلى و ده اللى محدش عايز يعترف بيه، المهم، فمن الأبواب دى قراية الجرانين بكل ما تحتويه من إفتراءات تجيب العصبى، فا بقيت مش متابعة الأخبار المحلية بشكل منتظم و أب تو ديت، يدوبك لو حاجة شفتها أو قريتها ف شريط الأخبار ع الديش، فا المهم كنت بتفرج إمبارح على الحياة اليوم، و من كذا مرة مشاهدة لقيت إنه كويس و اللى بيقدموه خفاف مش تقال ع القلب زى أديب بتاع القاهرة اليوم، المهم كنت سمعت يوميها الصبح عن حكاية البطاطس و تصدير البطاطس اللى فرحانين بيه و اللى تانى يوم منعته الإتحاد الأوروبى، فجابوا بأه سبب الموضوع ده، الطالب بظاظو بالفرقة الرابعة طب، و سمعت منه و منهم كيف واجه رئيس الوزراء السيد نظيف بلا خوف أو وجل و عبرله عن مكنون قلب التمانين مليون مصرى، اللى هوا البعدا احنا، اللى عمالين نهاتى ليل نهار و لا حد سائل، لكن بظاظو الكل انتبه لكلامه و كتبوه ف الجرانين و استضافوه ع الفضائيات، المهم، إزاى واجه نظيف بتردى أحوال البلد و الفساد المستشرى فيها، أصل الكلام ده مش بيكتب بالتفصيل الممل كل يوم ف جرايد المعارضة اللى بقرا عناوينها من وقت لتانى، و الناس تعبانة، و حضرتك بكيت يوم العبارة و للا القطر، و يبكى ليه و للا يتأثر و للا يستقيل ليه، هما دول ناس عندهم ذمة، دول يقتلوا القتيل و يتباكوا عليه ف الفضائيات، و دلوقت بنبيع ف البلد عشان نعيش طب و بكره، الناس حيبيعوا شرفهم و كرامتهم! لا فض فوك يا بظاظو، لأ، بكره حيبيعوا حضرتك و أهل حضرتك بالكيلو و ستات بيت حضرتك حيبيعوهم ف سوق الجوارى، المهم، كل ده و الكلام مش مترتب و محدش إدانا أسئلة و لا نص مكتوب ده كله تلكائى من الكلب، يا ولاد الكلب، بدليل إن بظاظا بيحكى إنه قبل ما يتولد السيدة الوالدة حلمت بالسيد الرئيس و هوه بيناولها بظاظا و يقوللها خدى عبد الله فراحت مسمياه عبد الله بناءا على توجيهات السيد الرئيس، و حلمك يا شيخ علام، المهم، فالسيد نظيف لا فض فوه هوه راخر رد عليه بجهبذة منقطعة النظير عن دلائل عصر الرخاء و العلم و التكنولوبيا و الزريبة الذكية و للا القرية الذكية ألا و هوه تصدير البطاطس للخارج، و هو أكبر دليل على الرخاء اللى بنرفل جميعا فيه، اللى من كتره لقى الإتحاد الأوروبى إنه بزيادة علينا رخاء فقام مانع إستيراد البطاطس منا و كفاية علينا تصدير الغاز لإسرئيل، يا حلاوة، يا فرحة الوالدة بيه و هوه مبسوط بنفسه أوى إنه قام دش الكلمتين المطلوبين منه على الفضائيات من كتر الديمقراطية اللى بنرفل فيها جميعا، بدليل الشعب اللى اتقفلت من مليون سنة و مش عايزين يصدروها تانى، و للا الإخوانجية اللى كل يوم حبة منهم بيتحبسوا و تتصادر أموالهم و تروح لنفس الجيوب اللى بيدخلها فرق السعر ف بيع الغاز و أتمان الأراضى اللى بتتباع بالملاليم و يعاد بيعها بالملايين و هلم جرا، و الشباب اللى ضاعوا و الشباب اللى لسه حيضيعوا اللى واخدينها جد مش بنظام الإذاعة المدرسية و الناظر عايزنى اقول ايه ف الأخبار النهارده، زى كل البظاظوهات اللى فى كل مكان ف البلد دى و خربوها من كتر إلتزامهم ب مبدأهم الأثير أبجنى تجدنى، أيا كان مصدر الأبيج. مش عارفة حيفضلوا يستخفوا بالناس لحد إمتى، بصراحة الشعب المصرى هوه اللى خللى الكل يستخف بيه كده من كتر سكاته على المهازل اللى بتحصل دى، و وصل إستخفاف العالم بينا لدرجة القتل الصريح ف الخارج، و أوضح مثل ما قيل من القتلة فى حالة فاتن رضا، ادبحها دى ما لهاش دية، ده بقى حال المصريين دلوقت بره و جوه البلد بسبب سيبانهم لشرذمة من الجهلة السفهاء عديمى الأهمية يتولوا حكمهم بالسياط كالنعاج، للأسف لإن لا دول يتمتعوا بالحد الأدنى للذكاء و الحصافة المطلوب للحكم، على العكس، ده كل ما كان الواحد من دول سفيه و مستهتر كبر منصبه و زاد اكثر فى علوه، و لا المحكومين بقى فاضل فيهم بره السجن من يتمتع بأدنى حد من بعد النظر اللى يخللى أى صاحبة عقل تشوف الخراب اللى عايشين فيه و الدمار اللى جاى لا محالة. البلد كلها بقت حبظلم بظاظا.