تساؤل

من فترة بس سهيت أكتب عنه ف وقتها، إشمعنى شريط صوتى ظهر لبن لادن يهدد فيه فرنسا بهجمات إرهابية وقت إقرار مشروع التقاعد الجديد ف البرلمان عندهم؟! حاجة غريبة إن ف الوقت اللى أقروا فيه المشروع اللى الشعب ابدى إعتراضه عليه بكل الكثافة دى يظهر شريط زى ده اللى بسببه إنتشر افراد الجيش ف الشوارع، مش برضه أى تجمهر وقتها أو حركة شعبية حتبقى تهديد للأمن القومى و يكون من حق الجيش يتصدالها؟! و الجيش و الدولة ف جيب مين؟! أنا شايفة إن بن لادن إستهلكوه أوى بأه و يفضوها سيرة و يدوروا على خيال مآتة تانى غير اللى ما بقيناش حتى بنشوفه، مع كل التقدم التكنولوجى ده إيش عرفنا مين اللى بيسجل كل التسجيلات دى؟! ده حتى الصور نفسها ما بقتش مضمونة و اللى عايز يشوف يشوف فيلم مانشوريان كانديدات بتاع دانزيل واشنطن لما حبوا يشيلوا صورته تماما من السيرفيلانس تيب حطوا مكانه صورة واحد تانى تماما و بقى بيتحرك زيه تماما، حتى الظهور الشخصى بقى مشكوك فيه بعد عمليات التجميل و كمان دكترة الأصوات اللى خلت ممثلين السنيما يبانوا ف الأفلام كأنهم بيكلموا لغات عديدة بطلاقة المحترفين ف حين إن ما حدش فيهم بيكون يعرف من اللغات دى أى شىء، الحكاية بقت جهجهونى أوى لما كل شوية يجيبوا حد بيكلم على شريط و ياللا تهديد إرهابى، الحذر مطلوب طبعا بس العالم الغربيين دول بأوا بيستهبلوا أوى ف مسألة تهديدات الإرهاب الموجهة لهم، زى العراق اللى كسروه بعدين بعد مانهبوه أووبس، ما كانش فى نووى، القيامة مش حتقوم بأه؟!
كمان: العالم بقوا حيحلبوا الناس، مش حتى عندنا لكن كمان ف أوروبا، جنة الأرض، بعد إستعباد البشر ف فرنسا و رفع سن التقاعد بحجة إن متوسط سن الإنسان إرتفع، و بالرغم من كل الهتافات إن اتنين و ستين حتبقى سبعة و ستين لإن المبدأ نفسه غلط و إن القرار ده حيعمل فتنة طبقية لكن مش فارق، لما نستنى قرار المحكمة الدستورية، ف إنجلترا كمان آدى رفعوا مصاريف الجامعة تلات أضعاف، يظهر مش عندنا بس بقوا عايزين أمة من الفراشين و مندوبى المبيعات لكن بره كمان، لإن قيادتهم بتكون أسهل من قيادة المتعلمين الواعيين، عشان البهوات يتفرغوا للسلب و النهب و مص دم البشر الطبيعين جميعا و اللى عايز يعيش يشتغل عندهم خدام، آدى الحال دلوقت ف عموم الدنيا، بس طبعا الحاجات اللى عندهم مهما كانت بالنسبة للى عندنا مجرد تربل إن باراديس