يادى الفضايح

مش فضيحة برضه لما أغانى مصر الوطنية، الربابة و ياحبيبتى يا مصر و ما تقولش إيه إديتنا مصر، تتحط على خلفية من ماتشات الكورة! حقيقى يعنى وصل الإستهتار و مش بس الإستهتار لأ ده الأنكى المجاهرة بالإستهتار لدرجة إن الإنجازات الوطنية بالنسبالنا و حسنا الوطنى بالإنتماء لمصر بقى يتلخص ف ماتش كورة؟! و لو اتغلبنا تبقى ضاعت إنجازاتنا بأه و ضاعت هيبة مصر و المصريين؟! عشان كده حقيقى بقيت بادعى عند كل ماتش للفريق القومى إنه يتغلب، و لو إنى لو حصل و لقيت نفسى بالصدفة بتفرج ساعتها بلاقى نفسى بصرخ لو قربوا م الجون عندنا، بس الناس مش حيصحوا غير لو اتغلب الفريق القومى عشان يشوفوا إن الإنجاز اللى الحكومة بتقدمه للشعب يفرح بيه على كتاف شوية عيال لعيبة جدعان و مجتهدين و غلابة مش أكتر من مخدرات بتنيم بيها الشعب اللى كل ما يغلب ف ماتش يتسطل و يخرج يهيص ف الشوارع كأنه جاب الديب من ديله و البلد غرقانة ف الفساد و الخراب و مص دمها و لولا إن البلد دى حقيقى مبروكة كانت مواردها خلصت من زمان بمعدل النهب و التخريب اللى بيحصل فيها ده، و اللى يوم ما كل مواردها حتتنقل ملكيتها للأجانب و نرجع لعصر الإمتيازات الأجنبية من تانى كل طقم الحكم الحالى حيبلغ فرار على أملاكهم اللى بره و حساباتهم اللى ف سويسرا، الناس مش حيصحوا إلا لما تتاخد منهم فرحتهم الوحيدة دلوقت و هى الكورة لإنها مش فرحة دى مخدرات و المهم إنه على كل الهيصة دى اللى أكيد للحكومة دور كبير فى تغذيتها إنجازاتنا ف مجال الكورة لا تتعدى افريقيا، حتى كاس العالم للشباب اللى نظموه هنا و صرفوا أد كده و خوتونا بتتربتتتيت مصر طول النهار خرجوا العيال من دور الستاشر، و سمعت مرة ف الجزيرة من واحد مصرى معارضة مش فاكرة مين إن الكورة بيتصرف عليها سبعة مليار ف حين إن المجالات التانية الحيوية محتاجة نص المبلغ ده و مش لاقيين، يعنى الحكومة بتصرف سبعة مليار ع المخدرات، لازم ترجع الكورة لحجمها الحقيقى، لعبة للتسلية مالهاش علاقة بالإنجازات الوطنية إلا كمحصلة للإزدهار فى مختلف المجالات ف الدولة مش تبقى دى هى الإنجاز الوطنى الوحيد