أهون من جناح بعوضة

نفسى أوصل كلمة لبنات المسلمين و اللى مش حتعجبها هى حرة، خليها لحد ما تطول سكين الجزار رقبتها، بلاش نكلم عن الدين، بفرض حسن النية لازم ندى اهمية لوجهة النظر اللى بتحبذ إن الإسلام كان خطوة على الطريق مش نهايته، و دى وجهة نظرى بفرض حسن النية، الإسلام لما جه جه بيحدد ماجاش أباح على اللى كان موجود، يعنى إدى المرأة حرية و حقوق بمقياس الزمن وقتها، إداها ميراث ف وقت ما كانش عندها ميراث، ف وقت كانت الإناث بتوأد فيه، حدد للراجل أربع زوجات فقط ف وقت ما كانش فيه قيود على عدد الزوجات و خللى الباقى ما ملكت اليمين و جعل عتق الرقاب كفارة من الخطايا، آظن كده حسن أوضاع بدرجة كبيرة، فلما تفضل الست مربوطة على نفس الحقوق اللى كانت بتاخدها من الف و ربعميت سنة لا تزيد عنها قيد انملة أيا كانت الأنملة دى إيه، بس مربوطة ما بتتطورش مع الزمن نبقى كده مسكنا ف نصوص و أغفلنا معنى النص تماما ألا و هو تحسين الأوضاع، الأ وهو إنصاف المرأة، ألا و هو تحرير المرأة و بكرر تانى تحرير المرأة، الإسلام جه حرر المرأة ماقيدهاش، و ده بمقياس زمانه، مع بقاء النص زى ماهو دون تغيير أو تطور كده نبقى بنظلم المرأة و بنغبن المرأة و بنستعبد المرأة مش بنحررها، فمع فرض حسن النية و إن الإسلام كان خطوة على الطريق مش نهايته يبقى الغلط اللى إحنا عايشين فيه دلوقت ده غلط المجتمع مش الدين اللى أدى رسالته وقتها و انتظر المجتمع يتطور مع الزمن، المجتمع اللى إستمرأ رجاله شهوانيتهم و حالة العجز اللى بتتفرض على الستات قدامهم بشريعة سماوية، لو الست من دول اعترضت على إهانة كرامتها بتعدد الزوجات و للا بإباحة تأديب الزوج للزوجة و للا بمبدأ الطاعة العمياء للزوج ف الفراش و خارجه و للا بحسابها كنصف رجل و للا بمصادرة حريتها ف السفر و التنقل دون إذن كتابى من وصى بيبقى عبدها ف الفراش، وللا بمصادرة آدميتها و أنوثتها اللى هما سلاح بيخوف أى راجل بالإصرار على العذرية بل و تشويهها جسديا بذريعة الختان و السنة الدينية، و إهدار دمها و تخفيف العقوبة عن من يهدر دمها بدعوى جرائم الشرف لمجرد إنها فى لحظة ما حست بآدميتها و مارست حقوقها الآدمية، تعالوا بأه ع الناحية التانية، راجل مفلوت عياره، يشرب يتعاطى يتصرمح ما فيش مشاكل، ده راجل و مافيش حاجة تعيبه! و جنبه أخته يعدى عليها الحول بعد الحول مستنية الفارس المغوار على حماره الأسود ييجى ينقذها من سجن عذريتها و يديها صك ممارسة أنوثتها! الحكاية مش إسلام و كلام فارغ بأه، دى الحكاية رجالة أخذتهم العنجهية بشهوانيتهم و ستات عايزين يعيشوا و خلاص! أو ستات إضحك عليهم و كبلوا بدعوى دى شريعة سماوية، حتعارضى ربنا يا كافرة! لأ إنسى بأه، الإلتزام بالعقيدة ده إيمان من الواحدة، أآمن إزاى بحاجة فيها ضررى و هلاكى و إهدار حقوقى؟؟ أنا مش عايزة خلاص ألتزم بالشريعة دى اللى بتتعللوا بيها ف تكبيلى و إهدار آدميتى و قصر النظر اليا على نظرة حسية من منطلق مصلحة الراجل فيا، سيطرته التامة على جسدى اللى بيها بتتهدر أى قيمة ف الست من أجل سجل الحركة ف المنطقة اللى بين الرجلين!! ده إستعباط إيه ده!! معلش بغض النظر عن كم الستات اللى عايشين مرتاحين تحت لواء النظام ده نبص للضحايا و اولهم أنا، واحدة بعقليتى و شخصيتى و موهبتى و تعليمى هل كان ممكن يستباح دمها بالشكل المذهل ده لو ما كانش المجتمع ده متخلف بالشكل ده طعامه المفضل هوه لحم النساء؟! فضيلة واحدة و الفضائل اللى أتحلى بها كتير جدا لم تحسب لى قدام إشاعة قذرة عن لحمى!! مين اللى اطلقها؟ اللى ماخدش مزاجه منى!! يا خبر اسود لما الاستهتار يوصل لكده و مجهود عمرى كله يروح بالبساطة دى عشان شهوانية مجتمع بيتلذذ بسيرة الجنس لإنه مش طايله و لا عارف يمارسه و لا بقى عندهم القدرة على معرفة متعته! يا بنات المسلمين، انتوا ع المجتمع ده أهون من جناح بعوضة، المجتمع اللى ينكر على المرأة أنوثتها لدرجة قطع جزء من لحمها لتقنين شهوتها و السيطرة عليها يبقى مجتمع متخلف حايكلك لحم و يرميكى عضم زى ما حصل معايا، و مجتمع أنانى منحط زى ده بيبصلنا زى حتت اللحم و بيحرم علينا حتى العلاج لو المعتدى علينا يقدر يرهبه يبقى مجتمع لا ندين له بشىء و كل واحدة تدور على مصلحتها احسن و تشوف هى يناسبها ايه، عايزة تلبس خيمة هى حرة، عايزة تعيش بعيد عن العرف و الدين اللى سكينتهم محطوطة على رقابينا احنا لوحدنا يا ستات برضه لازم تكون حرة، المجتمع ده الشىء الوحيد اللى بيحركه الخوف فا ميصحش احنا يا متمدنات يا صاحبات العقلية المتحضرة نضيع نفسنا مع عالم حنلتزم معاهم بكل عهودنا و بمجرد كرباج يتلوح لهم حينقضوا كل عهودهم معانا و كل مجهودنا و عمرنا يكون راح على فشوش، نظام بيحميه فشل و عجز و دونية اللى وضعوه و حرام احنا يا اللى مش فاشلين نلتزم بيه، و متهيألى بالنظر لموضوع الجواز العرفى اللى بيتقال انه منتشر ف الجامعات واضح ان معظم كلامى ده بأه مفهوم لدى الشباب