نونوس

شوية صور لننوسة من على الموبيل، و هى قاعدة على كرسى البلكونة، و هى ماسكة ف شرابى بتاع البيت إللى كانت الحبوبة تخطفه و تزوم عليه زى ما يكون حتة لحمة و تاخده تستخبى بيه تحت الدولاب و تلعب و ألاقى شراباتى متنطورة على أرضية الأوضة، و ف نفس الصورة أمها نايمة على ترابيزة السرير إللى بحط عليها اللاڀ توڀ، و كمان لحسن الحظ لقيتلها فيلمين فيديو على الكاميرا عندى ما كنتش فاكرة إنى مصوراهم، واحد و هى بترضع و التانى لما كبرت شوية، بس مش لما كبرت خالص، و صورة لها هى و أمها و هما واقفين على الكومودينو اللى جنب الباب ف أوضتى مستنيين العشا، كنت أقوللهم مستنيين الأوتوبيس، كانت أمها هى إللى تقف تستنى و طبعا نونوس وراها تقلدها، قشطة ما شاء الله ضخمة و تحب تاكل، و كذا صورة لسوسو و هى نايمة ف الأوضة التانية و برضه على ترابيزة السرير إللى مش عارفة إيه السحر اللى فيها هى و قشطة ما كانوش يهنونى على الكتابة أبدا و لازم يمددوا عليها و أنا بكتب، أنا باينة ف المرايا و انا ف السرير بكتب و بصور سوسو بالموبيل