العهر الإجتماعى

"خدامة راجل بصحيح" جملة إتقالت ف مسلسل "رجل و امرأتان" بتاع فاروق الفيشاوى و جوز الحريم اللى معاه، دلال عبد العزيز و الحرمة وفاء عامر. الجملة اتقالت على السطوح من احدى ساكناته جارة و صديقة وفاء عامر فى مدحها أمام سى فاروق، المحامى المتصيت زوج الهانم دلال الطبيبة الناجحة المعروفة اللى بتجوب أوروبا عشان تحضر المؤتمرات الطبية. تخيلوا بأه صنفه إيه الراجل الدنى ده اللى يسيب مراته الهانم، أم بنته الوحيدة اللى ربتها احسن تربية و علمتها احسن تعليم و جوزتها احسن جوازة عشان يروح يغرق ف المسقعة فوق السطوح مع جارة "المراسلة" بتاعه؟!! و بدل ما تتعرض حالته على انها وضع غلط و تصرف احمق لابد من تجنبه بالعكس، تتخلقله المبررات لكده بإن مراته "انشغلت عنه" بكاريرها!! يخرب بيت مرقعة الرجالة الشرقيين اللى ما بيعدلهاش الا الجواز من خواجاية تشحتفهم و تلبس اللى عايزاه و تعرف اللى عايزاه و تكلم اللى عايزاه و تعيش بسلو بلادها و لو معجبوش بالسلامة على بلدك و مانتش شايف عيالك كمان و ابويا سفارتى روح اتفاهم معاهم!! ماهو الافترا آخرته لازم تكون إفترا! لحد دلوقت بيبرروا للراجل من دول الجرى ورا شهواته حتى مع الخدامين بإن مراته مشغولة عنه! ياعم دانتو مجوزين بقالكوا اكتر من عشرين سنة و بينكوا بنت و عشرة و بيت و حياة بنيتوها سوا، يعنى ما نتوش لسه عيال ما فيش بينكوا الا أوضة النوم، مصهينة عنك طبعا من حقك تعترض، بس اتفاهم معاها و اكلم معاها و فهمها إن الوضع ده ما ينفعش و لو استمر كل واحد يروح لحاله احسن لأنك بنى آدم و لك احتياجاتك، احسن مليون مرة م الخيانة و الكدب و علاقات السطوح دى مع واحدة تقبل إنه يقول عليها الهاوس كيبر و هى مراته لأنها فعلا ما تزيدش عن هاوس كيبر، و هما الهاوس كيبرز وحشين! فل و عسل و احسن ناس بس ايش لم الشامى ع المغربى! هوه يا عالم الجواز أكلة و أوضة نوم! فين التفاهم فين التقارب فين عادات و أعراف و معتقدات الوسط الواحد اللى من غيرها بيحس البنى آدم إنه غريب مع الى حواليه! ماهو فعلا المنتاليتى بتاعة فوق السطوح إن شطارة الست و قيمتها ف الحياة تيجى من خدمتها لراجل "مقتدر" بكل ما تحمله هذه الكلمة من معانى، زى المنتاليتى بتاعه سى السيد و أمينة من عشرميت سنة، و لو إنى واثقة إن حتى فوق السطوح حاجات كتير أوى أوى إتغيرت و بقى فى هناك بنات و ستات متعلمات و عاملات و شغالات جدعات عندهم طموح شريف و قوة و قدرة و ذكاء يحققوا بيه الطموح ده لنفسهم و لأسرهم و بنفسهم بعيد عن دور خدامة الراجل. أنا متأكدة إن الأفكار المغرقة ف التخلف دى و بالذات بخصوص الجنس و وضع الست بالنسبة للراجل هنا و فى مصر بالذات و ترويجهم البشع لها بكل الطرق بحيث إن ما بقاش فى مسلسل يخلوا من راجل بيفترى ف مراته و السبب طبعا هى، ده مخطط سياسى و الله عشان الناس النايمين آولريدى يغرقوا أكتر ف شهواتهم و يزيدوا المجتمع جهل على جهل و ماحدش منهم يصحى و يلتفت للحكومة بتهبب إيه و ينضم للناس إللى بيتحركوا، خليهم غرقانين ف المسقعة الأرديحى و الحمام المحشى، و الله كان بيكلم ف المسلسل على المسعقة بالبشامل اللى بياكلها ف بيته كأنها رجس من عمل الشيطان، آل إيه الطباخ مش عارف يعمل المسعقة السادة. سمعتها مرة ف دكتور فيل واحد م الوايت تراش بيلخص دور الست ف حياته ف جملة عبقرية حملت كل معانى دونية الرجالة ف الدنيا و لخصت نظرة الراجل الدون للمرأة، الجملة دى كانت " هير جوب إز توو فيلل ماى ستومك آند إمتى ماى بولز"!!!!!!! نفس الثقافة اللى بيطلعوها ف البرامج عندهم عشان الناس تتفرج ع السيرك إحنا هنا بنعمل عنها مسلسلات تمجدها عشان نشكل بيها الوعى المجتمعى ف البلد اللى مش ناقصة تخلف دى لحد ما آخرتها حنرجع لأيام الحرملك و الجوارى و سوق العبيد، كالعادة الست الشرقية هى دايما الحيطة المايلة للمجتمع اللى حيسمح ولاته و جباة ضرائبه أن نص المجتمع التانى، الراجل، يفرغ فيها عقده و احباطاته عشان يتلهى عنهم، ف المجتمع ده الست ممكن أوى إنها تاخد بالمواربة و الحيلة و إستخدام أنوثتها أبشع إستخدام أكتر مما يمكن إنها تحلم بيه، لكن بالمواجهة و الحق حتبقى مسترجلة و "ناشز" و حيكسروا عضمها. و زى كل شىء ف المخروبة دى، بارادوكس بين الأفعال و الأقوال، مكاسب جديدة لحقوق المرأة و تنمية دورها ف المجتمع بعدين تلاقى أهم جهاز ف الدولة و هو التليفزيون اللى الناس بتنام على حسه لسه بيبرر لأوضاع زى كده. لما السيد الجهبذ حسين عمارة يقعد ف المسلسلاتى يتكلم بكل فخر عن الرائعة اللى حضرته كتبها و النهاية العبقرية اللى حطهالها بإن الزوجة المتعلمة الناجحة الجميلة الغنية وقفت ف الكوريدور بتاع المستشفى شايلة ابن "ضرتها" على إيديها و بنص كلامه "تقبلت الوضع"!! ليه؟!! مافيش طلاق؟!!! عشان ست بالمستوى ده تقبل خيانة و ضرة و كمان بالفرق ده ف المستوى؟! تقبل إنها تعيش مع راجل دون بالشكل ده بعد ما يساويها بكل اللى بتديهوله من فهم و حب و عشرة بأكلة و نومة ف السرير؟!! تقبل تعيش مع راجل عايز يبرطع فوق السطوح و بعدين يرجعلها يلاقيها فاتحاله رجليها و دراعاتها عشان تبقى الواجهة البراقة ليه ف المجتمع!! إزاى ممكن مجتمع يبرر أنانية و ميكيافيللية بالشكل الفج ده لفرد من أفراده إلا إذا كان المجتمع نفسه ميكيافيللى و بيحكمه البطش مش الحق؟؟ مجتمع يخاف ما يختشيش؟! دى لو اطلقت مش الف يتمنوا تراب رجليها؟!! جريمة "تقصيرها" ف "حقوق" جوزها دى اللى بيبرروا بيها كل أفعال الرجالة و خياناتهم و ضربهم و قتلهم للستات إشمعنى بتفوت و لا الهوا لما الراجل من دول يسيب مراته ف البيت زى الأرملة مع العيال و على احسن الفروض يدفن نفسه ف شغله أو ف أحوال كتير أوى يدور يصرمح مع صنف الشراميط اللى يعرف حقيقى يطلع البدع على جتت صنف الرجالة ده و عشان كده بيعشقوهم؟! ساعتها الكلام عن الست "العاقلة" الكاملة اللى لازم تتحمل جوزها لحد الريح ما تعدى و آهى نزوة و تروح لحالها إنشالله يكون كل يوم بيصرمح مع شرموطة شكل، "بكره يعقل"!! طب لما هوه مش عاقل ما نحطه ف سراية المجانين!! سايبينه يحكم و يتحكم ليه!! ما نحجر عليه بدام سفيه و مش عارف مصلحته و حيخربها عليه و على غيره و يبدد حقوقهم ع الهلس اذا كان بالصرمحة او بالجواز؟! اكلمت كتير اوى ف الموضوع ده و عن اثر الجواز التانى او المليون على الأسرة. هو مسلسل مش أكتر و ما يستاهلش كل التعليق ده، ده لو بيتعرض ف السنيما و كل حد حر يروح أو ما يروحش، و حيبقاله منتجين حيخسروا دم قلبهم لما فكرهم ما يلاقيش حد يدفعله عشان يشوفه و ده اللى حيحصل لو ف السنيما، لكن ده "تليفزيون الحكومة" يعنى ملك "للشعب"، و لازم يوجه لتنمية الوعى مش تدميره، مش عايزين سياسة و لا مناقشة التوريث على التليفزيون، كفاية الدش، بس إشمعنى الرقابة ف كل حاجة إلا الوعى بحرية المرأة و إستقلالها و كرامتها كإنسانة ما تقبلش غلى نفسها نفس إللى الراجل من دول ما يقبلوش لنفسه؟! لحد إمتى و ف وضع المرأة بالذات مصرين اننا نعيش بعقلية الجوارى؟؟ مش ده يبقى عهر إجتماعى؟!