الجنس سلطان

إيه اللى خلانى أكتب العنوان ده؟ هى ملحوظة لاحظتها الحقيقة من مدة و كنت ناوية اكتب عنها بس سهيت عنها لحد ما قبت ف دماغى تانى. منظر العيال بتوع أفريقيا المساكين يا عينى، اللى مش لاقيين ياكلوا و صغننين كده خالص و فيهم اللى اتولدوا يا عينى من هنا عشان المجاعة دى تتغذى عليهم، زى ما ساعات عندنا القطة من دول تولد بعد ما يفضلوا العيال ف بطنها كذا شهر، يتولدوا صاحيين لإن أمهم بتاكل عندنا، رفيعين صحيح من كترهم ف بطنها بس عايشين و كويسين، بس ما يبقاش الأم من صغر سنها عندها صدر ترضع و مهما عملنا هما يومين و يرجعوا مطرح ما كانوا، فكأنهم يعينى جايين عشان يفارقوا الدنيا، أهم عيال أفريقيا دول كده، ليه بأه الجنس سلطان، لإن بالرغم من المجاعة و الهم و طبعا قلة النوم من كتر الجوع و طبعا الهدة إللى فيها أهل العيال دول، برضه بيلاقوا نفس و "صحة" يخلفوهم، يخرب بيت كده، ده بأه لا النوم و لا الجوع و لا الفيضانات و لا حاجة خالص تقدر تقف ف وش المحرك الأول للبشر، فعلا هوه المحرك الأول للبشر، هما إللى بيدوروا ع القوة و الفلوس و النفوذ بيدوروا عليهم ليه؟ ما هو عشان الجنس، و تلاقى الواحد من دول يسرق و يمكن يقتل عشان يلبس و يتأنتك و الناس كلها تتلف حواليه، ليه؟ سيكنج آبروفال، عايز يتحب، عايز الناس تقرب منه، بس للأسف إختار أغبى و أشنع الطرق للتقرب للناس، إللى معظمهم أمنيتهم الأولى يكونوا محبوبين و محترمين و مكرمين عند الآخرين مع كده كل الناس خايفين من بعض، ليه؟ لأنهم بيختاروا أشنع الطرق للحصول على الحب، الكدب و الخديعة فتلاقيهم اللى بيحصلوا عليه من بعض ف الآخر زيف على كل المستويات و علاقات مسطحة بتنهار عند أول مفترق طرق، الوسيلة الوحيدة للحصول على حب نضيف و صحى و قوى هى الصراحة، ما تتظاهروش أبدا بأشياء مش فيكم للحصول على رضا و اعجاب من حولكم، البنى آدمة تبقى على طبيعتها، اللى يحبها زى ماهى أهلا و سهلا و اللى مش عاجبه بالسلامة، ده ما يتعارضش على الإطلاق مع الإحتفاظ بالخصوصيات و محاولة تجنب الإنتقاد، يعنى إذا كان فينا طبع بيتعارض مع المجتمع و بيثير إنتقاده و مش عايزين مشاكل منه بلاش نفتح السيرة من اصله، بس كمان ما نتنكرلوش لو جت سيرته، ندافع عن معتقداتنا بهدوء و نتمسك بيها بقوة مع تجنب المشاكل بدام ده إختيارنا، و كمان ما يتعارضش مع محاولة إرضاء الشريك أو المحيطين بينا، بس المهم يبقى مفهوم كل بنى آدم طبعه إيه و إيه اللى نقدر عليه و ايه اللى ما نقدرش عليه و تبقى كل الأمور واضحة، ده بيسهل كل حاجة لإن ساعتها بنبقى واقفين على أرض من الواقع مش أوهام أو كدب أو علاقات مبنية على رتوش خارجية بيضطر أطرافها يفضلوا يمثلوا على بعض لحد ما ف الآخر بيزهقوا و الأمور بتتفجر إلى مالا يحمد عقباه. ده الكلام عن موضوع اللى الناس بيعملوه ف سبيل إنهم يتحبوا، بالنسبة لعيال أفريقيا ف اللى مش فاهماه ليه مش بيدوا أهاليهم حبوب منع حمل لحد ما المجاعة تفوت، بدام مافيش حل و ما فيش أكل يكفى، مش حرام العيال المسكين دول ييجوا الدنيا من هنا و يتعبوا بالشكل ده من هنا؟! حرام بجد، و مافيهاش إبادة أو القضاء على عرق أو حاجة، لكن عشان اللى بيحصل للعيال ده حرام، بلاش ييجوا احسن، كام سنة تحديد نسل يسيبوا فيها الأهل على راحتهم بس من غير ما يجيبوا عيال، حتى كده الأكل و الدوا يكفى، على ما تنحل المشكلة، و كما ذكرت من قبل الدنيا مليانة خير بس مافيش عدل و لا ذمة