تصحيح

- للأسف ف بوست "الإخوانجية" لخبطت ف اسم صاحب قضية أكياس الدم هانى سرور عضو مجلس الشعب، مين عبد الحى ده؟! يظهر كنت واكلة فراخ يوميها، مش توفيق عبد الحى ده كان بتاع حكاية الفراخ من مليون سنة؟ و لا مش هوه برضه؟ معلش السن بأه، فوتوهالى. بمناسبة فتح السيرة تانى مش قادرة أفهم اشمعنى الحكومة ف كل الحالات بتعترف بأحكام القضاء فيما عدا ف حالة الإخوان! اللى خدوا كذا حكم ف صالحهم من القضاء المدنى كان آخرتهم يتحولوا للقضاء العسكرى عشان ينطسوا حكم زى اللى انطسوه ده، هانى سرور متحولش لمحاكمة عسكرية ليه؟ أصحاب بلاوى القطر و العبارة و قصر الثقافة متحولوش للقضاء العسكرى ليه؟! وللا أى حاجة تحصل ف العبيد اللى هما المواطنين مش مشكلة و مش حكاية لكن أى حاجة تهدد "استمرار" النظام تبقى كارثة و عايزة محكمة عسكرية!
- انا مش عارفة ايه التقتيل ده كله ف العراق! ده مش حيفضل ناس ف البلد بالشكل ده! و بعدين اللى يفرقعوا قنبلة ف وسط سوق، ناس بيشتروا و يبيعوا طلبات بيتهم، ليه كده!