الدين أفيون الشعوب

سمعت إمبارح من الشيخ اظن اسمه خالد الجندى مش فاكرة ف برنامج ايه، و لا يمكن حتى ف البيت بيتك مع محمود اسمه ايه، المهم على قناة مصرى، "حديث شريف" و حطى تحتها مليون خط، تلاتة كانوا مسافرين فحصل سيل فدخلوا مغارة يحتموا فيها فاتحرك حجر كبير سد المغارة، فعمل كل واحد فيهم على الدعاء لدفع البلاء، كل يذكر طيبات اعماله ثم يدعوا بها لتفريج الكرب و هو ده الهدف من ذكره لهذا "الحديث"، الأول قصته كويسة و معقولة وهى عن صاحب عمل كان احدهم بيشتغل عنده و بعدين سابه و له فلوس عنده، فصاحب العمل عمل على تنمية ماتبقى من اجر الشخص ده فلما جاء يطلب منه باقى اجره اداله قطيع أد كده من استثمار امواله، على الله يحس اللى سبت عنده نص شهر و طفشت، ده كلام كويس و مش فيه اى عيب، اتحرك الحجر شوية بفعل دعوة الراجل ده، ما كانش حد غلب، المهم، اسمعوا بأه الباقى، التانى كان له بنت عم فقيرة و كانت تطلب منه العون لكن كان يراودها عن نفسها و هى ترفض فكان يرفض مساعدتها، يا حلاوة، المهم ف وقت مجاعة جتله و قل اصله معاها برضه فيعينى المسكينة رضخت، فلما دخلوا جوه و هم بها طلبت منه يتقى ربنا فيها، فآل معدوم الذمة ده إفتكر ربنا ساعتها بس و تركها و آل إيه ف أحاديث تزوجها!! عظم الله أجرك يا سيدى! و بفعل الدعوة النميسة دى اتحرك الحجر حبة كمان، طيب، الحكاية التالتة، واحد راعى غنم كل يوم يحلب الغنم و يروح يسقى أبوه و أمه و إخواته، كلام جميل أوى، ف فيوم راح بسطل اللبن لقى إخواته مستنيينه لكن أبوه و أمه نايمين، فالجهبذ الوفى رفض يسقى إخواته و سابهم يباتوا جعانين و فضل واقف بسطل اللبن ما بيتحركش لحد الصبح مخافة مغبة أن يتحرك فيستيقظ أبواه!!!!!!! يعنى نوم المسلمين ف العسل و تضييعهم للوقت ما جاش من بعيد بأه، آدى واحد فارط ف حياته و واقف م المسا للصباح آل إيه مش عايز يتحرك ليصحى أبوه و أمه، يا اخويا ما تسقى اخواتك و تسيب لأبوك و أمك نصيبهم يشربوه لما يصحوا، و لا تصحيهم يتعشوا أحسن! ما هى الغباوة اللى حلت علينا كمان مش جاية من بعيد، يعنى حضرتك مش عايز تتحرك لتصحيهم، و هى دوشة إخواتك العيال الجعانين ماصحيتهومش؟! يا عالم فوقوا بأه، و الله لو جيبنا مليون نفس من بره يشوهولنا حياتنا ماحد حيقدر يعمل كل اللى احنا بنعمله ده