سلوكيات مجتمعية

برضه كعادتى فى ملاحظة السلوكيات المجتمعية إللى لازم بيظهر أثرها ف الأفلام حتى لو إفتكرناها مجرد تهليس، زى السخرية من مظهر الست الحامل كوكيلة نيابة مثلا أو رئيسة وزارة كأن الحمل ده فضيحة، يخرب بيت كده! و هوه إنتوا يا رجالة جيتوا إزاى؟! و منيــــــــــــــن؟! أو زى خيانة الزوج و معرفة الرجال للساقطات إللى دايما بتظهر ف الأفلام كمادة فكاهية و خيانة الزوجة أو علاقة الست من غير جواز إللى دايما نهايتها لازم تكون الموت جزاءا لفعلتها "الشنيعة"، الخيانة غلط طبعا من أى طرف بس مفروض المساواة ف الفعل و جزاؤه للطرفين، و أنا ف رأيى إن تضخم مسألة الشرف ف المنطقة عندنا بالشكل ده أو قديما ف العالم كله سببها أصلا إقتصادى، و هو الأطفال إللى وجود أى منهم معناه فم جديد يحتاج للطعام. المهم من ضمن السلوكيات دى سلوك شفته ف فيلم "خمسة شارع الحبايب" بتاع نجلاء فتحى إللى شفته أول إمبارح، السلوك ده هوه إنه بالرغم من التجريم و التحريم التام لسلوك الزوجة الخاينة أو أى ست تمارس علاقة خارج الزواج ف مافيش ما يمنع من عمل بيزنس معاها و الإستفادة منها، حسن يوسف عايز يعمل إستعراض و محتاج تمويل و نجوى فؤاد متجوزة "على الزرقانى" و بتشتغل رقاصة و بتخونه، قوم حسن يوسف عشان ينقذ جوزها المدله فيها منها يغريها إنها تبقى عشيقته و يطلقها من جوزها لكن ف نفس الوقت ما فيش مانع من إنه ياخد فلوس م الممول إللى هى عرفته عليه!!!!!!!!!!!! هى مش دى ست مشيها بطال برضه و مش مفروض التعامل معاها أو اللجوء لها أصلا؟! هوه مش المبدأ الصح يقول إن إللى ما رضاش عن سلوكياته ماتعاملش معاه و لا يبقالى معاه مصلحة؟! هوه مجتمع ملخبط تماما و كل حاجة فيه أساسها المنفعة و المظاهر، المنفعة و إدعاء الفضيلة، و الستات بالنسبة للمجتمع ده حتة لحمة مش أكتر لإن زى ما التعرية و الإستثارة إمتهان للجسد، الحياة تحت خيمة متحركة برضه إمتهان للجسد و لعقلية صاحبة الجسد ده