دردشة

- نفسى حد يلاقينى زى ما بلاقى القطط بتوعى كده، ليڤينج هاپيللى إڤر آفتر
- إتفرجت إمبارح على فيلم على الكويت بلس، كان عن واحدة بوليميك، إكسيسڤللى بوليميك، كان بسبب التوتر الشديد إللى كانت عايشة فيه، فى سبب تانى للبوليميا أظن ستات كتير أوى بيعانوا منه، الرڇيمات الجنونية إللى الواحدة تاكل فيها بيضة مسلوقة ف الفطار و بيضة مسلوقة ف العشا و ربع رغيف و خضار مسلوق و حتة لحمة ف الغدا، رڇيمات جنونية مش عارفة مين الحمير إللى إبتدعوها و روجولها بالجنون ده بيتعاملوا فيها مع الست من دول كأن معدتها دى معدة عصفورة، كأن لقمة صغيورة تشبعنا و خلاص على كده، و لحد دلوقت لو الناس تتفرج على قنوات الديش فيها إعلانات عن الدوا و للا الأعشاب إللى تخسسك بالعشرة كيلو ف اسبوعين، و طبعا آخرة كل الأوهام دى هبوط و أمراض و بوليميا زى فيلم إمبارح و كمان الواحدة لما تخس بالسرعة دى بترجع تزيد أضعاف إللى خسته، و إحنا الستات يا عينى بنجرى ورا الأوهام دى عشان ننول الرضا السامى و نبقى زى غصن البان و إلا ما فيش حد يبص ف خلقتنا، ميت ماركت و الواعية إللى تفوق لنفسها منه و من غسيل الدماغ بتاع الجمال ده و تشوف مصلحتها و إللى عاجبه على كده عاجبه، المهم الصحة، نفسى أوصل الكلمتين دول لكل البنات إللى ف الدنيا، دورى على نفسك و مصلحتك و سيبك من إللى غيرك ممكن يديهولك و لا يعملهولك و لا حتى يحسسك بيه، إللى بيدى حد حاجة ممكن ياخدها منه ف ثانية لكن إللى تعمليه لنفسك ما حدش يقدر ياخده منك أبدا، إللى بيعرفوكى عشان حلاوتك و لا أى مظهر م المظاهر ساعة المظهر ده ما يروح مش حيبصولك و حيدوروا على واحدة تانية يمصوا دمها، إللى يحبوكى زى ما انتى كده هما دول إللى وورث نوينج فعلا و حيعمروا معاكى الحياة كلها و حتلاقيهم وقت الجد، خليكى على طبيعتك و إفتحى قلبك و كونى واضحة و إللى عايزك زى ما إنتى أهلا و سهلا