روميو و إشطة

خالتى عديلة اللى عايشة ف طنطا بلد جوزها من ساعة ما جت من سويسرا و هى عندها 16 سنة للأسف جالها إلزهايمر، و مش محتاجين نكلم عن أعراض المرض. المهم خالتى كانت من محبى القطط زى كل عيلة الحفناوية و كان عندها قبيلة حطاهم ف بلكونة البيت الواسع جدا، صفصفوا على قطة واحدة لقيتها مرمية ف السطوح وسط الكراكيب لدرجة إن لما شفت حاجة بيضة ف وسط صندوق الكراكيب إفتكرتها حتة فروة حطينها ف وسط الحاجة لحد ما طبطبت عليها فصحيت لأنها شيرازى بيضة بعيون زرق فطرشة ما بتسمعش، فروتها كانت كلها لمبس و كلاكيع م الوساخة لإن طبعا كل اللى الشغالين اللى من أرياف طنطا يعرفوا يعملوه انهم يأكلوا و بس، حتى الطبطبة مش دايما. المهم صعبت عليا و قررت آخدها مصر ألاقيلها بيت و فعلا عملت كده، خدتها ف صندوق ف العربية و هى بحكم فصيلتها مش خوافة، يعنى سوسو الجحشة حبيبة قلب ماما لما كنت باخدها لحد مدينة نصر بس عشان تعمل العملية و لا تكون عيانة كانت تعمللى سيرك و تعملهالى ف البوسيت بتاعتها و أقف على كوبرى أكتوبر أشيل و أرمى على الباركينج بتاع القطارات اللى تحت الكوبرى و حكايات الجحشة لحد مالقيت دكتور من مستشفى قريبة لما عييت المرة اللى بعديها جالها البيت و بقت كويسة، سوسو قطة صيادة و أكيد لها فصيلة لإن شكلها بالظبط باشوفه ف قطط كتير ف الشارع و ده طبعا تشابه ما بيحصلش إلا ف الفصايل زى الشيرازى و الفارسى و كده، هى سوسو و السلام من غير فصيلة أو أى حاجة. المهم سميت الجحشة البيضة إشطة، ، تانى يوم جينا هنا ف مصر حمتها أما نزلت طينة، و على الإزعاج بتاعها بنت اللذينا، لحد ما سميناها الجعورة الحديدية من كتر ما مبتتعبش م الجعير و ف عز الليل حتى، أول ما جت كت تصحينى ما كنتش بعرف أنام، سوسو ميعاد نومها من و هى صغيرة الساعة حداشر، أقفل عليها باب الحمام الكبير و إحنا بلليل نستعمل الحمام الصغير، و انا غالبا أنام بعدها بساعة أو ساعة و شوية، دى بأه كات تصحينى الساعة 2 ف عز الليل و الساعة 6 الفجر زى ما يكون عندى بيبى، و طبعا سوسو مش قبلاها و كل ما تشوفها تصرخ لحد ما التانية أم زغرة شرانية راحت جارية وراها و هبشت فيها و بقت ماما تحجز بينهم بطبق الغسيل اللى كان ف إيدها، بتاعتنا خوافة جدا و طيبة جدا، إشطة بأه ضخمة و قوية بالرغم من الخمستاشر سنة ماشاء الله و شرانية لما حد ينرفزها غير كده نايمة طول الوقت يدوبك تصحى تاكل، المهم ف الأول كانت مش مخليانى أنام، حطاها ف البلكونة و ساعة الضهرية ف أوضتى و بلليل تبات ف البلكونة على فرشتها تحت الكرسى، كنت عاملة زى اللى مجوزة اتنين و عايزة ارضى ده و ارضى ده و ف الآخر على دماغى. خدناها معانا السخنة طول الأسبوع اللى فات، كانت مش مخليانا ننام، تعوى طول الوقت لحد ماعواها جابلنا قط سميناه روميو عشان كانت تقف له ف التراسينة و هوه يقفلها تحت ف الجنينة و يفضلوا يبصوا لبعض و يعووا،حتى ف الصورة اللى متشعلقة فيها على الشباك كان واقفلها بره، هى طبعا كت بتشوفه أو بتشم ريحته لأنها مش بتسمع، لحد ما بقينا نسيبها تخرجله و نجرى إحنا و العيال وراهم و برضه يزوغوا منا و بعدين نفضل ندور عليهم لحد ما نلاقيها يعينى مش عارفة تاخد نفسها م الحر و ترجع تشرب ميه قد كده، المهم قضوا شهر عسل سريع سوا يدوبك اليومين اللى سبنهاله فيهم، هديت طبعا عن الأول كتير ف السخنة، حتى صورتها و هى قاعدة على التابلوه بتاع العربية و إحنا راجعين، و ماشاء الله من ساعة ما رجعنا و هى هنا ف مصر زى النسمة و خلاص خدت على النظام اللى عملتهولها، العشا التقيل الساعة حداشر و الفطار سبعة أو تمانية على حسب ما اصحى و بعد كده غدا مرة أو اتنين، لأن الأكل بيجيب نمل ف البلكونة فمش ينفع أسيبلها أكل طول النهار زى سوسو، حتى الكتكوتة لقيتها النهارده واقفة مستنية قدام الشباك ف ميعاد الفطار، من غير ماتزن أو حاجة، مستنية بس الباب ينفتح، كلمت الدنيا كلها حتى جمعيات القطط عشان ألاقيلها بيت لها لوحدها و لسه مش لاقية، أدينى لسه بسأل، لكن مش حتضر لو فضلت هى و سوسو مع بعض، يمكن سوسو تاخد عليها.

Amina abaza group for cats:
33813855
0123162912

Mona khalil group for cats:
Mona_khalil@yahoo.com
0122188823