إسكانيات

معايا كام ألف جنيه ف البنك حطاهم شهادات إستثمار، المهم بعد إللى شفته من إرتفاع أسعار العقارات بشكل جنونى و هبوط قيمة الفلوس يوم عن يوم لقيت إن أنسب حاجة أجيب بيهم عقار أأجره، المهم لقيت ست عارضة شاليه بتاعها ف راس سدر بتمن على قد الكام ألف إللى معايا فرحنا عملنا كلنا رحلة مدرسية يوم الجمعة إللى فات ده و كان عيد الأم كل أم و هيا طيبة، أنا و ماما و دودى أخويا و مراته و جوز العفاريت بتوعنا، رحنا هناك لقيناها قرية ظريفة و فيها فيلل جميلة جدا من المرحلة الأولى، واسعة بطريقة خرافية و فيها بوتينشيال كتير، لكن مع تأكيدات الست صاحبة الشاليه، و إللى طلعت دكتورة ف الجامعة و مشتركة ف الإضراب النهارده، مع كل تأكيداتها إنها ما عليهاش أى أقساط و إنها دافعة تمن الشاليه بالكامل، و اللى إتأكدت منه بنفسى من الشركة، إلا إنى رحت لقيت الشاليه مش متشطب، آه فيه سراميك و دهان لكن من غير أبواب أو شبابيك أو خضرة حواليه و كذلك معظم الشاليهات من حوله، يعنى لو خدته، بغض النظر عن المشوار الطويل نسبيا، حقضى أجازتى مع الفيران. إتضح بعد كده من كلامى مع الست دى إن الشركة متعثرة لإنهم عملوا كذا مشروع ف كذا حتة و الإقبال دلوقت بقى أكتر على العين السخنة عشان طريق القطامية، مع إن كل إللى واخدين هناك أكدوا على إن الجو أحسن كتير من السخنة لأنه مش فيه رطوبة خالص ف الصيف فهناك مصيف و مشتى بعكس السخنة إللى من بعد إبريل مش بنروحها خالص. المهم كنت عقدت العزم على إنى حاخد الشاليه و اوضبه و لو معرفتش أتفسح فيه حفضل قفلاه و الأرض كل مدى بتغلى و ده جنب البحر يعنى منطقة سياحية، لإنى بعد ما شفت حصل إيه ف قرية عزة ف الساحل و هى القرية إللى جنب لاسييندا بتاعة الجمال على طول، مع إنها كانت تحفة ندا بيتش دى و كنا كل ما نبص على لا سييندا من البلكونة نقول إيه الأرف ده و ده مين إللى حيشترى فيها، كفاية لون الأحمر الحلاوسكة بتاع قبة أندريا إللى على السور بتاعها، المهم طلع مالك ندا عبيط و ماعندوش نظرة ف التجارة خالص، ما دخلش كهربا و مياه ف القرية مع إن فيها برج موبيل و الكلام إللى فهمته إن الشركة ساعتها تخيره تدخل الكهربا ولا تديله كاش فالطماع خد كاش، فكانت الكهربا جينيريتورز بيدفعوا كل عشر تيام حاجة بتاعة ستميت جنيه من يت عزة بس جاز للجينيريتور، و الميه خزانات، بس القرية نفسها كانت عاملة زى الحلم بلونها الروز و القرميد الطوبى و تصميمها الرائع و وسعها الخرافى، صورها ف الفوتو ألبوم القديم، المهم عشان الميه و الكهربا و قلة الدعاية محدش كتير إشترى فيها فخربت و الراجل إدين و ف الآخر لاسييندا المؤرفة القبيحة إشتروها و هدموا الفيلل و القصور التحفة و ضيقوها و عملوها الستايل المهبب بتاعهم، و من ساعتها و بيت عزة مقفول لإن الإدارة الجديدة عايزاهم يدفعوا مبلغ للخدمات الجديدة يعادل المبلغ إللى إشتروا بيه الفيللا، و الشاليه إللى جنبهم إللى زى بتاعهم تمام بقى بيتباع بتلاتة مليون، المهم كان واحد صاحب جوزها شارى ف القصور إللى ع البحر، و هى خمس أوض و مطبخين و حمامين و ريسبشن أد كده و بسين و جنينة كبيرة أوى و كمان كان واخد الفيللا إللى بتلاتة مليون دلوقت، باعهم لما كانت القرية خسرانة يمكن بتمن أقل من إللى إشترى بيه، دلوقت بيضرب أخماس ف أسداس بعد قصره إللى ع البحر ما بقى بيتباع بخمسة مليون و الفيللا بتلاتة و القرية طبعا إتبدلت تماما، قبيحة قبيحة آه، مش زى الأول ع الأقل، لكن حمامات سباحة و خدمات و كل حاجة و ناسبنا الحكومة و مش أى أى. يعنى إللى قصدى منه إن و القياس مع الفارق الخرافى طبعا، الشاليه بتاع راس سدر ممكن يحصل فيه نفس الموضوع و تيجى شركة و لا أوتيل زى هلنان إللى جنبهم مثلا يشتروا القرية و الشاليه يبقالوا قيمة، المهم ده كان قرارى لحد إمبارح لما بصيت ف موقع النقابة بتاعتنا، لقيت تغييرات كتير أوى، كاتبين إنهم واخدين خمسين فدان ف أكتوبر بين الحى التامن و التاسع حيعملوها مدينة سكنية بنظام الإسكان اللطيف بتاع اليومين دول، العمارة تلت تدوار و الدور شقتين و مساحات من 100 لحد 170 متر و حيتم طرحها للبيع قريب، حلو، و خدوا 200000 ألف متر ف الكيلو 78 الساحل يعملوها قرية و كمان عملوا نادى للنقابة قدام جامعة مصر للعلوم و التكنولوجيا على مساحة 35 فدان و بإشتراك و إفتتاح المرحلة الأولى شهر مايو الجاى، المهم سألت النهارده ف النقابة إللى هنا ف جامعة الدول لإن العامة مش ممكن الإتصال بها، حتى لما بدفع الإشتراك ببعته مع السواق مش ممكن المرواح هناك، المهم سألت قاللى المشروع لما يتم طرحه للبيع حيعلن عنه ف الجرنان، أوكيه، إللى خللى الفار يلعب ف عبى بأه إيه، سألته ع النادى قاللى إفتتاحه شهر خمسة ده، طب و الإشتراك كام، لسه ما تحددش!! طب إزاى بأه يا أستاذ؟ طب لما حيفتتحوه كمان شهر مين حيروح؟ مش لازم يكون فيه مشتركين؟! فابالشكل ده ممكن أوى على ما الإعلان ينزل الجرنان يكون الوحدات إتباعت للحبايب و كمان الإشتراكات المخفضة كلها ف النادى و بعد كده إرفع السعر ف السما، مش عارفة هى الحراسة إتشالت من ع النقابة و لا لأ، إللى قريته إن المحكمة حكمت بإقامة الإنتخابات لكن غير كده مش عارفة. دى حكاية الشاليه و النقابة، حكاية تانية بأه لقيتها و انا بدور على شقق ع النت، لقيت موقع قال إيه، البنك الأهلى للإستثمار العقارى، البنك الأهلى بتاعنا ده، بتاع الغلابة إللى زينا بتوع العلم لا يكيل بالبدنجان، زى دكتورة الجامعة دى إللى كل إللى عرفت تجيبه شاليه محندق ف آخر الدنيا و كمان إتنصب عليها فيه، المهم بأه البنك الأهلى بتاع ودايع و معاشات الشعب ساعة ما يعمل إستثمار عقارى يعمل إيه، إسكان متوسط للشباب مثلا و لا للطبقة المتوسطة إللى بقى تعليمها و أصلها ف السما و فلوسها ف الأرض؟ حاشا لله، دول ناس أيــــــــاه، ناس كخ، البنك الأهلى تحالف مع أحد المستثمرين معرفش مين بالضبط و جاب السيد المهندس صبور كإستشارى أو مقاول أو يكون هوه الممول ما عرفش، و على فكرة هوه إللى بانيلنا عمارة شارع الأنصار إللى مش طايلين حاجة من شققها المقفلة إللى بيدفع فيها السكان إيجار عشرة جنيه ف الشهر، أول بدايته طبعا، و ده على حسب كلام ماما، المهم البنك الأهلى حل كيسه، كيس الشعب ع الأصح، و إدى فلوسه للتايكوونز، يكونوا شركة الأولى السعودية أوغيرهم مش عارفة، عشان يستثمرهالوه ف حوالى 10 مشاريع أقسم بالله ماشفت فيهم كلهم شقة واحدة، كلهم فيلل من التقال أوى من إللى بكذا مليون، يخرب بيت كده! هوه البلد دى بقت يا مش لاقيين و بيموتوا ف طوابير العيش يا مليونيرات! و المهم ف موضوع لقيته ع النت و حاطة عنوانه تحت كاتبين عايزين يعملوا الحى الدبلوماسى ف القاهرة على غرار الحى الدبلوماسى ف واشنطن و يطوروا العشوئيات، شيلوا العشوائيات أللى جنب وزارة الخارجية إللى كانوا هاجوا عليها من كام سنة و حطوا الحى الدبلوماسى، وضحت. حقيقى فعلا أنا إللى طول عمرى أصحابى م المليونيرات و عمرى ما فكرت ف الموضوع ده أبدا دلوقت بقيت ببص بتشكك لكل صاحب ملايين، غصب عنى و الأوضاع بقت بالشكل ده، طبعا الأغنيا الشرفا كتير بس الحكاية لخبطت أوى و الشبهات بقت كتير و خصوصا الأغنيا الجدد و بتوع التجارة بالذات، الموضوع بقى ملخبط و الفساد وصل للأعناق فعلا. لو سمعتوا زييى ف الجزيرة مباشر ندوة تأبين الدكتور عزيز صدقى الله يرحمه و الكلام على الفساد الحكومى فى موضوع بيع ثروة الأراضى المصرية لأصحاب الحظوة إللى إتقال فيه، و بعدين نشوف بنك الشعب الأول بيبنى فيلل عشان يبقى إحتلال مقنع لأرض البلد من كل صاحب ثروة ييجى من بره بالدولار و الشيكل يشترى قصور ما يحلمش بيها ف بلده بملاليم من الجنيهات المصرية مقارنة بالدولار و اليورو، نبقى إحنا بنسهل إحتلال البلد تحت قناع الإستثمار العقارى لحد ما أولاد البلد يبقوا مهجرين جوا بلدهم لأنها كلها بقت فيلل ف مصر و الساحل لأصحاب الدولار و فلوسهم مش جايبالهم حتة يسكنوا فيها. كمية الفيلل و الإسكان الترفيهى دى كلها لمين مش قادرة أفهم؟؟ هما عدد إللى عندهم قدرة لشرا الفيللا و لا الشاليه من دول بمليون و لا كذا مليون كام بالظبط هما و عيالهم؟؟ لما متر الأرض ف ستة أكتوبر يقفز ف سنتين من 1200 ل 2000 و شوية و متر الأرض عند كارفور بقى ب 2000 و شوية و متر الأرض ف مدينتى ب 4100 ، يعنى تقريبا نص مليون ف شقة 100 متر صاحب المشروع واخد الأرض فيه ببلاش على حسب كلام إللى ف الندوة و كلهم أساتذة جامعة و أعضاء مجلس إخوانجية يعنى مش حكوميين، يبقى الناس العاديين يسكنوا فين!! فى حاجة أكيد بتتبلور جوه الناس، كل صحف المعارضة عمالين بكلموا عن ثورة الناس و ثورة الغضب و الناس ساكتين، كأن بتوع المعارضة عايزين ينحرروا الناس و الناس مش هاممهم و لا هما هنا، بس لما الواحدة تبص حواليها كده و تخرج راسها شوية من حياتها، إللى حقيقى مالهاش صلة على الإطلاق بكل إللى ف مستواها و إللى إبتدوا معاها و زيها لكن مع كده المرتاحة ماديا نوعا ما، و تبص للناس المحتاجين و تفكر ف الشباب البسطا إللى أكيد عايزين يبتدوا حياتهم، لازم أقتنع بأن فعلا اكيد فى حاجة بتتبلور جوه طبقة البسطاء من شدة عوزهم و رؤيتهم لشدة السفه إللى بقت بتحكم موارد هذه البلد المنكوبة.
موقع النقابة: http://www.eea.org.eg/
موقع البنك الأهلى للإستثمار العقارى: http://www.alahly.com/
تأسيس شركة قابضة مصرية – سعودية للاستثمار العقاري باسم " الأولي مصر 6/5/2006: http://www.trenta.net/News/default.asp?newsID=260