لحد إمتى؟

بالصدفة شفت إمبارح آخر نص ساعة من برنامج "بعد العاشرة" على دريم، و كان عن أزمة المرور، و كان أحد المهندسين إللى عرف نفسه بإنه الإستشارى للجهة التنفيذية لأحد مشروعات الهاى وايز بس مش عارفة أنهى، و كان كلامه إن المشروع بالشكل المصمم به حيتسبب ف حوادث لإن لازم يتعمل حارة لوحدها لعربيات النقل، بعد كلام كتير عن تفاقم رهيب لمشكلة المرور كلنا طبعا لامسينه و اقتراح عبقرى لعضو مجلس شعب بالإمتناع عن بيع العربيات لمدة خمس سنين، بس طبعا هوه "عربياته" و "عربيات" المدام و "عربيات" الأنجال حتفضل زى ماهى، بعد لت و عجن كتير إكلم زكريا عزمى إللى ف الحقيقة ماسمعتوش و لا حاولت أسمعه قبل كده، إكلم بس عشان "يهب" فى الإستشارى ده قال إيه "مستعجبا" و "مستغربا" من كلامه و مطالبا إياه بتقديم إستقالته من منصبه الإستشارى للمشروع للبرهنة على إعتراضاته، "إمال عايز تقبض و بس؟!!!!!!!!!" ، إنتهى البرنامج، دون رد من أى من المشاركين ف البرنامج على أقوال الدكتور، على وعد من الراجل بتقديم إستقالته تانى يوم الصبح!!!!!!!! صحيح إللى إختشوا ماتوا، يا فرعون إيه فرعنك، مالقيتش حد يردنى!! يا عالم يا مجرمين، قطر و عبارة و قصر ثقافة و عيال شباب بيغرقوا هربانين م الفقر و البطالة و ضحايا طوابير و راجل إتقتل ف السويس هبوللى كده و قبله مصريين قتلوهم عساكر إسرائيليين على الحدود و نهب لموارد دولة بحالها زى ما يكونوا صحيوا الصبح لقيوا بابا البيه سابهلهم ف الميراث و تطبيع ماحدش طايقه و لاطايق تبعاته و لا الإنبطاح و التفريط لليهود ف موارد الدولة زى الغاز و البترول و من بعدهم جاى الميه طبعا ده غير مصايب السياسة الخارجية، و لاحدش منكوا عنده نقطة دم تخليه يستقيل و عمالين تقبضوا و تمصوا دم البلد لما جالها لوكيميا و سعادة البيه جاى يهب ف الراجل الإستشارى عشان بيعمل بلقمته و كان صريح و بين العيوب إللى ف المشروع بصراحة بدل تمام يا فندم إللى خربت الدنيا، طبعا لما الراجل يستقيل حيجيبوا واحد بداله من الماركة سالفة الذكر يكدب كل أراؤه و إللى على حسب سير الأمور طبعا صح، يا فرعون إيه فرعنك و انت عينك تندب فيها رصاصة، طبعا، و ما تفرعنش ليه و انا عايش ف وسط خرفان ما حدش فيهم بيدافع عن نفسه على كل البلاوى إللى بعملها مع الألاضيش بتوعى