ثقافة الحريم

كالعادة كنت بقلب الريموت ف محطات الديش، إستوقفنى برنامج من البرامج الشايعة اليومين دول عن علاقة الست و الراجل كان على ابو ظبى أو دبى ما كنتش مركزة، إللى إستوقفنى فيه مش الجديد أو القيم إللى فيه، أو لإنى بيستهوينى النوع ده من البرامج، بالعكس، أنا بقيت كل مالاقى برنامج من النوع ده أسيبه على طول من كم الإستفزاز و الغباوة الشرقية إللى فيه فيما عدا يمكن كانت برنامج هالة سرحان و شلتها على روتانا مع التحفظ برضه على بعض الهيافة و الغباوة الشرقية إللى يظهر مش مسموح لبرنامج من النوع ده يظهر على الشاشة من غير ما يحتوى على بعضها، كفاية إن لحد دلوقت ما سمعتش واحدة ست بتعترض على بقاء تعدد الزوجات و إحنا ف القرن العشرين، المهم، كانت أول جملة سمعتها فيه هى "الراجل شمعة البيت، إحنا من غير راجل ما نساويش حاجة"!! أوكيه يا ست العبقرية، حضرتك فاضية خالص كده من جوه للدرجة دى براحتك، ما حدش يقدر ينكر أهمية الجنس الآخر فى حياة شريكه بس مش لدرجة "التلزيق" ده، و خصوصا إنها مش كلمة واحدة بتقولها لحبيبها أو جوزها من كتر حبها فيه، ساعتها حتبقى طبيعية و لها معنى، لكن ده برنامج عام على قناة فضائية، يعنى مفروض بيشكل وعى العامة، و إحنا مش ناقصين مركبات إستعلاء من الراجل الشرقى على الست أكتر من إللى بيعانى منها المجتمع ده، لحد هنا و كلام ما يتهضمش فمش تتسد و تسكت، لأ، لازم تستشهد على خيبتنا التقيلة و مصيبة الشرقيات بقال الله و قال الرسول، قال إيه، أيام الرسول جتله واحدة مع أهلها، أبوها و أمها و اخواتها، يشتكوله من جوزها إللى ضربها، يا دهوتى ع المصايب، قام الرسول قال إيه طلب منهم يقعدوا يشربوا المشروبات و طلب من أم الزوجة المضروبة أنها تقلع بنتها هدومها و تلفها بملاية عشان هيا، المضروبة، تخدم عليهم و تقدملهم المشروبات!!!!!!!!!!!!!!!!!!!! خليك مع الكداب لحد باب الدار، المهم، الست الجهبذة إللى بترويلنا الحكاية النميسة دى على الفضائيات، إللى فيها كل توابل التخلف الشرقى-الإسلامى إللى بيحبه بتوع قعدات الشلت من أهل الشرق و إللى بيخلى عالم زى بتوع الدنمارك لما يسمعوها يشتموا نبينا و يلعنوا سنسفيل الإسلام و المسلمين بمنتهى راحة الضمير و بعد كده نعد نصوت و نلطم على هوان الإسلام و المسلمين، المهم، و المضروبة دى بتخدم عليهم قوم إيه، على رأى العمدة بتاع الحلمية، النبى، عليه الصلاة و السلام، يشد ملايتها من عليها فتتعرى!!!!!!!!!!!!!!!!!!!!!!! كمان صف علامات تعجب، قامت الزوجة، و كم من الجرائم ترتكب باسم الزواج عندنا، جريت و استخبت ورا جوزها اللى ضربها!!!!!!!!!!!!!!!!! مش أمها مثلا إللى لسه قالعة قدامها هدومها و لفاها بالملاية!! قوم النبى عليه الصلاة و السلام يقولهم، أهلها إللى جايين يشتكولوه الزوج البلطجى إللى ماترباش و ما يعرفش يتشطر إلا على واحدة ست لكن يجرى من قدام واحد يعرف يضربه و يرد عليه، يقولهم شوفوا، آدى إللى جايين تشتكوا منه، ما لهاش غيره، نظام يعنى قطعنى حتت أنا ملك ايديك، كل يوم صبحها بعلقة و مسيها بعلقة طب و فيها إيه دى يزعل، ماهو ضرب الحبيب زى اكل الزبيب، و اكسر للبنت ضلع يطلعلها اربعة و عشرين. لحد هنا خلصت الحكاية بتاعة "الحكيمة" بتاعة الحقن الفضائية، بالذمة ياكدابة، النبى محمد ممكن يكشف عورة ست قدام إخواتها أو أبوها أو حتى أمها؟؟؟؟؟!!!!! يا كافرة يا مفترية النبى حيسمح لنفسه بكشف و رؤية عورة إمرأة؟؟!!!!!! يا دى الإسلام إللى بقى مش أكتر من قهر للمرأة و بس، من قتل بسبب فقد العذرية لتعدد عشيقات و إفترا و إستسلام للشهوات باسم تعدد الزوجات، و ضرب باسم تأديب الزوجة و العيال حتى ما بقاش حد دلوقت بيربيهم بالضرب، ثقافة مشوهة شهوانية متخلفة غريبة الشكل تدعو الى الدهشة من الإستغراق فيها و الإتغماس فيها كل مدى أكتر م الأول، و المهم لازم يجيبوا ست غبية متخلفة هى اللى تكلم كل الكلام ده عشان يعنى يبقى شهد شاهد من أهلها و الحقيقة إن الستات إللى بالشكل ده مفروض إحنا يا ستات نعدمهم فى ميدان عام رميا بالبلغ لإنهم خائنات لجنسهم و بيحرضوا كل حيوان عنده أى ميل للافترا على جنس الستات إنه يفترى فعلا لأن بالدين أهوه ده حقه و عداه العيب!! راح فين "رفقا بالقوارير" و "ولن تعدلوا و لو حرصتم"، راحت فين عقولنا و قلوبنا و راح فين الحب و العشرة و الخوف على بعض و على إحساس بعض، راحت فين الآدمية لما بقى الإسلام مجرد تحريض للرجل على إتباع شهواته و كمان تنمية نزعة البلطجة على اللى أضعف منه فيه بالشكل ده؟؟ هوه ده صورة الراجل قائد الأسرة و الأب و الزعيم زى ماهما بيرسموها ف الدين، شهوانى بلطجى ستات؟؟ يخرب بيت كده. أنا لا ليا دعوة بإسلام و لا مسلمين من زمان، ربنا بتاعى و ربتى أمى بتوع مزيكا و شعر و إحساس و حب و حق و عدل و رحمة، يكونوا مسلمين يكونوا مسيحيين يكونوا بوذيين يكونوا زى ما يكونوا المهم إن الجمال و الحكمة هوه أساس حكمهم، لكن يصعب عليا الإفترا و إن أكتر ناس بيأذوا الإسلام هما المسلمين نفسهم، و سيدنا محمد كنبى لا يمكن يثور لرغبة سيدنا على ف الزواج على ستنا فاطمة بالشكل ده و بعدين يهتك عرض زوجة. ده كلام إفترا و ما يصحش على الأقل زى ما قال المفتى الجهبذ بتاعنا "لأنه ميت و ما يقدرش يدافع عن نفسه" !! يا ستات دافعوا عن نفسكم و بلاش يعلمونا الندالة و الإنبطاح و خطف رجالة بعض باسم الإسلام، بلاش ثقافة الحريم إللى بقينا عمالين ننغمس فيها يوم بعد يوم دى و بتنميها فينا أجهزة الإعلام الشرقية عشان ننشغل بقعدات الشلت و الجنس المريض و العلاقات الزوجية و الأسرية المريضة و التخلف و الجهل و الضلمة و نتلهى عن العالم إللى بره بيخططولنا إيه. بالإحصاءات عدد الرجالة العزاب ف مصر 250 أو 350 ألف و الستات العزاب 150 ألف، مش 9 مليون ست عازبة زى ما عايزين يوهمونا، حقيقى الواحدة بينقصها كتير لما ما بيبقاش فى راجل ف حياتها، لكن لما بيبقى راجل بجد، يحبها و يحطها ف عنيه، مش بلطجى يفترى فيها، ساعتها الواحدة تقول الله الغنى و تعيش حياتها زى ما هى عايزة و ميهمهاش حد، الست مخلوقة مستقلة بذاتها مش محتاجة لراجل ف حياتها أكتر ما الراجل بيحتاج لست ف حياته، كل فى حياة التانى لا يقل عن الآخر أهمية.