يا طعامة المم

جبت ديب فريزر الكترو ستار اربعة درج لطيف خالص، عشان الفريزر عندنا ما كانش بيكفى لما أطبخ كذا صنف مرة واحدة و ابقى عايزة اشيل ف الفريزر عشان مبحبش وقفة المطبخ و العرق كل شوية، مليته مم على تمة عينه، بقية الصوانى اللى م الأول و كمان بأه عملت عجينة طعمية ف الكبة طلعت خرافية لإنى بموت ف الطعمية بالبيض زى الأومليت كده، و بعدين يوم ما اختى كانت هنا هى بتحب المكرونة فعملت مكرونة بالمشروم و الزتون الاسود و الفلفل الاخضر و التخديعة، بصل و توم مقلى ف الصلصة، خرافية، و بعمل المكرونة بالزيت تقوم لما تبرد تتاكل م التلاجة على طول و بيتبقى احلى من و هى سخنة، و بعدين بأه كنت أما أجيب علبة المشروم الكبيرة آكلها كلها على كذا يوم، كده بأه بقيت أعمل اللى أطبخه و الباقى أشيله مع باقى الزتون، و عملت مرة صلصة للمكرونة، يعنى أسلق الكيس و أسخن الصلصة و اللى موجودين ياكلوا، و بعدين جبت سمك و سبيط و قسمته على أكياس بتتبيلته، توم و كمون و شطة و خضرة و زيت و نقطة ميه و حطيته ف الفريزر كل مرة ف كيس، يعنى أطلع و أقلى أو أعمل صينية، و كمان عملت محشى فلفل بس مش طلع سوبرب، طلع لبة شوية و الخلطة عايزة كمان شوية تحبيش، بعمله بالزيت برضه عشان بيبقى أحلى و كمان لما بيسقع بيبقى طعم، فحزود شوية خلطة على مرتين الرز اللى ف الفريزر، و بما إنى مدمنة شوربة فعملت أنجر شوربة خضار و قسمته على أربع مرات و أدينى كنت بتغدى دلوقت من مرة منهم، و رنجة متنضفة من شم النسيم، فجبت الفريزر و مليته لتمة عينه و كل غربال جديد