مش فاهمة

أب أم إبن ماله أرواحنا فدا نبينا
مش فاهمة إيه مش فاهمة إيه ده ااوى حب لينا
ده كوبليه ف أغنية م الجداد
بأبى أنت و أمى يا رسول الله
دى مقولة معروفة عندنا كلنا. سيبك م الأغانى إللى بقت وسيلتنا الوحيدة ف التعبير عن نفسنا حتى أصبحت الفعل الوحيد إللى نقدر عليه مهما كان المصاب، ده مش الموضوع إللى حتكلم فيه لإن ده تاريخ السواد الأعظم من أمة وعيها إتشكل و أصبح من المستحيل تقريبا تغييره، و كلنا عارفين المقولة الشهيرة يجمعهم المزمار و تفرقهم العصا. الموضوع هوه إنه مش قادرة أفهم أما يبقى الأم و الأب صالحين و مش مقصرين ف حق ولادهم ف التربية و الحنان و الرعاية بكافة أشكالها و متحملين للمسئولية الجسيمة إللى إختاروا أنهم يحملوها بنفسهم يوم ما قرروا يخلفوا و هيا مسئولية جلب أرواح للدنيا، إزاى ممكن الواحدة تستبدلهم بأى حد ف الدنيا؟ و لا أستبدل ولادى إللى أرواحهم متعلقة ف رقبتى بربنا نفسه حتى؟! هو معزة الإنسان عند الإنسان إللى زيه بمكانته و قوته ف المجتمع و لا ف الكون حتى و لا بالعشرة الحلوة و الإخلاص؟! مش حيحب البنى آدم إلا البنى آدم إللى زيه، إللى يفهمه و يحس بيه حتى لو ما كانش المساعدة ف طاقته مهما بذل من طاقة، هوه ده الحب، بنى آدم مخلص بيبذل أقصى طاقته عشان يريحنى مهما كانت الطاقة دى محدودة و يمكن ما تحققش نتيجة و كمان مش حيفكر ف يوم ياخد تمن إخلاصه ده غير ريق حلو و إخلاص ف المقابل و دول هما الدهب الحقيقى ف أى مكان ف الكون للى بيفهموا، مش سوڀرمان يقول للشىء كن فيكون ويا عالم جاب القوة دى إزاى و ياعالم حياخد منى إيه ف مقابل مساعدة ف ساعة زنقة، المصلحة بأه حاجة تانية تخلينى أبيع أقرب الناس ليا عشان واحد يمكن يعرف يحل حبل المشنقة من على رقبتى، لما تبقى الأم، البنى آدمة الضعيفة إللى طاقتها محدودة صالحة، و حملت و رضعت و تعبت و سهرت و مرضت و كنست و مسحت و إشتغلت و صرفت و حلت مشاكل و طبطبت و هدهدت و دافعت عن ولادها زى الوحش لو حد قرب منهم، الواحدة تستبدلها إزاى بواحد ما شافتوش و لا تعب فيها يوم مهما كانت سمو مكانته و أخلاقه الرفيعة؟! مش فاهمة!