المصريين أهما

مش عارفة لو ما فيش ماتشات كورة للمنتخب فى مصر حنسمع الأغانى الوطنية إمتى؟! معقول يبقى الإنجاز الوحيد إللى يجتمع حواليه شعب ما هو الفوز ف ماتش كورة أيا كان أهميته؟! فى بلد رئيس الجمهورية بيفتتح محطة صرف صحى و محطة معالجة مياه و كوبرى، يعنى مجرد مشاريع خدمية مش مصنع حديد و صلب حكومى ضخم أو محطة طاقة نووية من تصميم و تنفيذ أبناء الشعب مش تسليم مفتاح أو إنتاج صاروخ جديد زى إيران، بالـتأكيد أكبر إنجازات الشعب حتبقى ماتش كورة. ف الصور المنشورة مع المقال ده عناوين صحيفة الأخبار الحكومية فى اليوم التالى للمباراة و كذلك إطلعوا على مانشيت صحيفة "الوفد" الحكومية أيضا, ناس هايصة ف الإستاد و ناس لايصة ف الكريمات, و هنا لازم أتوقف و أذكر رأييى فى أن كل صحف المعارضة صحف حكومية و الحكاية كلها توزيع أدوار، حتى المرفوع ضدهم قضايا و "مهددين" بالسجن، الحكاية كلها يا إما تمثيليات يا إما تحجيم لميلهم ناحية أمريكا ف حال ما زاد، يعنى مجرد "بيتك بيتك" لو سرح واحد م القطيع و خد براحه شوية، و بالتأكيد من ناحية المعارضة فهما فى إنتظار أى فرصة للقفز للسلطة حبا ف السلطة، مش لمصلحة البلد، إيه إللى بيخلينى أقول الكلام ده؟ سبب واقعى جدا و هو إن ف مصيبة مهولة زى مصيبتى تنذر ببداية بيع أفراد الشعب "أحياء" لتعذيبهم و إجراء تجارب عليهم عينى عينك لإرهابهم و إرهاب من حولهم بعد فتح المجال على مصراعيه للتجارة فى أعضائهم، بعد مصيبة زى دى، إكتفوا جميعا بتلفيق تهمة "شرف" و تهمة زيها ف عقلى و إشتغلوا كلهم مع الحكومة، و دى حاجة أنا لمساها بنفسى و يمكن لو ماكانتش ايدى ف الناركان تم خداعى و تنويمى زى الكثير من أفراد الشعب ده، زى زمان، و لو كنا ف بلد محترمة كانوا هدوا البلد ع إللى فيها من أولها لو وصلت الحكاية لما وصلت له معايا بغض النظر أنا مين و حجمى إيه بالنسبة للسياسة مش يستنوا لما أنا أبتدى أفوق لروحى م الصدمة و ألملم نفسى لما بقت الحكاية معاهم معاهم عليهم عليهم زى لعبة قمار و أحس كما لو كنت محطوطة ف البورصة و الحاجة الوحيدة إللى بتحمينى هى دراعى، فأنا إنسانة و مواطنة و ليا حقوق بالقانون مش من حق أيا كان يتعدى عليها و إلا بقت غابة زى ما هى كده دلوقت، و لو كنت محترفة أو قاتلة أو متهمة بأى جريمة مش ضحية تحرش فى مكان عمل و بيتم قهرى يوميا لإفقادى عقلى و دفعى للإنتحار للتستر على الحضيض إللى وصل له الجميع معايا و إخفاء القرون اللى نبتت على رأس هذا الشعب و حكومته عن أعين العالم، و حنروح بعيد ليه، و مين ينسى إللى عمله السود عشان رودنى كينج، مش أنا إللى دمى بأه حلال لطوب الأرض. فالسكوت على جريمة مهولة زى دى و إستمرارها عشرين سنة معناه إن كل طق حنك المعارضة ده تمثيليات و الشعب الإنفعالى إللى ماتش يجيبه و رغيف يوديه بقى داجن من رهبة السياط، لإن زى ماذكرت قبل كده أكتر من مرة أنا مش فلسطين أو العراق و محتاجة جيوش تحررنى، مجرد الرفض من الناس حيمنع الحكومة من الإستمرار فى الجريمة دى و لو بقتلى، لكن مين يتعظ، "أكلت يوم أكل الثور الأبيض". الحقيقة أنا مش عايزة أظلم حد، أكيد فى ناس كتير متعاطفين معايا من غير ما اعرفهم و خايفين على روحهم كمان زى انا ما بتعاطف مع كل المصايب إللى معرفش أصحابهم شخصيا، و أكيد ناس كتير يتمنوا يغيروا الأوضاع ف البلد عموما، بس المعارضة النظيفة هى عقل الناس دول و دى موجودة حاليا عندنا ف البلد يدوبك بنسبة 20% يعنى لا تكفى لتنظيم تيار شعبى يغير مجرى الأمور، عشان كده كتير بيفضلوا عدم المخاطرة بأنفسهم و السير ف سكة إللى يروح ما يرجعش دون فائدة. نرجع تانى للعناوين، ف الأخبار حادثة تصادم مروعة لوحصلت ف أى بلد كانت الدنيا كلها وقفت على رجل، بس ف بلد القطر و العبارة حادثة زى دى مجرد لعب عيال، و فى الوفد حبس 1000 فلاح متعثر، و قبل الماتش بمدة كان مانشيت فى الأهرام مقصود به "طمأنة" الشعب، قال إيه لدينا مخزون قمح من أجود الأنواع يكفينا لستة أشهر!! يا مصيبتى!! بلد القمح و القطن بدل ما شعبها يبقى غرقان عيش و فطير مشلتت و حكومتها تكلم عن "أراضينا الشاسعة المزروعة بالقمح" تتكلم عن مخزون قمح لست أشهر و تلت تربعه مستورد من أمريكا؟! يا دى المصيبة! دى السعودية بتصدر قمح و إحنا نعمل إعلانات فى التليفزيون الحكومى عن القمح الأمريكى!! ده الرغيف بأه قد اللقمة و غلى الطاق مليون، الرغيف بتلاتين قرش أد الرغيف الشامى بتاع ساندوتش الفول و الطعمية زمان. بعد ما المحكمة حكمت بعدم دستورية فرض رسوم نظافة على فاتورة الكهربا رجعوا رجعوها تانى! و هما فين عمال النظافة دول؟! و مش عايزينهم، لسه الزبال بيجيلنا ياخد الزبالة زى زمان و بياخد ملاليم كل شهر. راس مال المعاشات إتصادر و دخل خزانة الحكومة و بدل ما سقف الزيادة يكون مفتوح بنسبته من المعاش 10% حطوا حد الستين جنيه أقصى زيادة! ليه؟! نقابتنا محطوطة تحت الحراسة و كلام عن سرقة مليار جنيه منها على مدى العشر سنين إللى فاتوا و ياعالم القرار الأخير برفع الحراسة و إجراء إنتخابات حيتنفذ و لا لأ. البلد عايشة بالسلف و الدين و الناس غرقانين كورة، و متهيألى لو لعيبة الكورة دول نزلوا عن مستواهم فى القارة، لإن إحنا على أد أفريقيا و بس، و بطلوا يسهروا الناس للفجر ف الشوارع، حيتحاكموا محاكمة عسكرية و تتعلقلهم المشانق بتهمة إيقاظ الشعب من نومه.

P.S : أهل غزة كسروا السور الحدودى بينهم و بينا و ارتاحوا شوية م الحصار، أنا أهرب من جلدى إزاى؟ و الا اهرب من جهنم دى عشان ابدلها بجهنم التانية؟